على الرغم من أن كل أب وأم يسعيان لتربية أولادهما بشكل جيد، ويحاولان توفير كل سبل الراحة له منذ نعومة أظافره، إلا أنه فى كثير من الأحيان قد يقوم الوالدان بتدمير نفسية أولادهما من خلال بعض الكلمات التى يقومان بتوجيهها لهم.
"أخوك أحسن منك أو مش هتتغير" كلها تعبيرات سلبية قد يتم توجيهها للأطفال خلال حياتهم اليومية، دون أن يدرك الوالدين أن هذه الكلمات قد تكون قاسية بشكل كافٍ لتدمير نفسية أطفالهم، ولمعرفة أكثر 10 كلمات من الممكن أن تؤذى أطفالنا، تواصلنا مع الأستاذة أمل غالى، الاستشاري التربوى ومدربة التربية الإيجابية المعتمدة.
وقالت أمل غالى فى حلقة جديدة من برنامج "kids area": "فى 10 كلمات لو أحنا بنستخدمهم مع أولادنا وبصفة مستمرة يبقى أحنا بندمرهم من غير ما نأخذ بالنا، رغم أننا مش عاوزين كده بس ممكن فعلاً ندمرهم".
وتابعت قائلة: "أول كلمة ممكن تدمر نفسية أولادى هى أنت دائمًا تعمل كدة وعمرك ما هتتغير" وتوضح قائلة: "لو قلت لابنى الكلام بالطريقة دى أنا بقفل عليه باب أنه يحاول يعمل أى حاجة، كأنى بقوله أنت هتفضل كدة طول عمرك".
ثانى كلمة يمكن أن تدمر نفسية أطفالك: "أنت مش زى أصحابك ومش هتنفع زيهم"، حيث أوضحت أن توجيه مثل هذه العبارات من الممكن ان يجعل الطفل يرى نفسه دائما أقل من أى شخص، وسيعلم الطفل المقارنة الدائمة بينه وبين أصدقائه، ويرى نفسه شخص سئ.
واستكملت أمل غالى عن الكلمات التى قد تدمر نفسية الطفل قائلة :"كلمة أنت فاشل، حتى لو على سبيل التحفيز، قد تتعب نفسية الطفل جدا، ومش هيعرف حتى يدافع عن نفسه، وقد يأخذها على أنها حقيقية".
وأضافت قائلة: "فى أمهات بيستفزها أولادها، فممكن تقولهم (أنت غبى)، وخاصة فى أوقات المذاكرة أما تشرح لهم أكثر من مرة، هما ممكن يكونوا محتاجين طريقة ثانية لتوصيل المعلومة".
ومن أخطر الجمل التى أشارت إليها أمل غالى هى "أنا أصلا ما كنتش عاوزة أخلف ثانى، أنت جيت غلطة"، قائلة: "الجملة دى قاتلة على نفسية الطفل، متخيلين أن فى إنسان يشوف نفسه أنه غلطة فى الحياة، بتخليه يشعر دائما أنه عالة على البيت وعلى الحياة، وممكن يوصله لمرحلة الأكتئاب".
وأضافت: "فى جملة أمهات كثيرين بتقولها وهى (أنت مش هتعرف تتصرف أو مش هتنفع فى حاجة أصلا)، هو كده بيأخذ فكرة عن نفسه أنه مش كفء ومايقدرش يعمل حاجة فى الحياة، فيحط نفسه فى صورة أنه عاوز دايما معاه ويساعده فى طلباته".
ومن الجمل المؤثرة على نفسية الأطفال "أنتى طالعة لعمتك أو أنت طالع لخالك"، حيث قالت أمل: "الجمل دى خصوصا لو الشخص المشار إليه مش بنحبه، أنا كده بفهمه أنه طالع زيه وأنى بكره الشخص ده ومش عاوزاة يبقى زيه، هنا الطفل يقول أنا ذنبى أيه، ويشعر بالظلم، وأنا كأم بحسر ابنى فى منطقة هو مالهوش دعوة بيها، لازم نفصل لأن أولادنا مالهمش ذنب".
"أخوك أحسن منك ومريحنى جدا عنك" واحدة من الجمل التى يوجهها الآباء لأبنائهم كثيرًا، وعن أضرارها تقول أمل غالى :"بالطريقة دى ممكن تخلى الطفل يكره أخوه، هو مش هيتحسن علشان يبقى زيه، بلاش مقارنة الأخوات ببعضها".
وأضافت: "فى جمل بقى زى التعليق على الملابس أو الشكل زى جسمك شكله وحش، أنتى قصيرة، كلها تعليقات لاذنب للطفل بها، هو مش هيقدر يعمل حاجة، المعايرة بشكل الجسم أو بلون البشرة من ضمن الكلمات اللى بتوجع أولادنا جدا، وبتعمل شرخ فى علاقتنا بهم".
وأنهت أمل غالى قائلة :"خلينا دايما نأخذ بالنا من الكلمات اللى بنقولها لأولادنا، لأن ممكن ندمرهم من غير ما نأخذ بالنا".