فنان من صغر سنه.. "مالك" جمع بين حبه لكرة القدم ورسم الكاريكاتير

رغم صغر سنه إلا أن الطفل مالك ياسر، صاحب الـ10 سنوات، نجح فى أن يجمع بين شغفه بالرسم وعشقه لكرة القدم، وكانت النتيجة رسوم كاريكاتير رائعة لشخصيات لاعبى كرة القدم المفضلة له، وكذلك الفنانين الذين أحبهم. قالت والدته رحمة عبداللاه فى حديثها لـ انفراد: "إنه بدأ الرسم فى الرابعة من عمره، فى البداية كانت مجرد شخابيط وكان دائمًا يحب يمسك القلم ويشخبط فى الورق ويطلع شكل حلو وكانت ألوانه جميلة جدًا ومنسقة ومن هنا بدأت أفهم أنه بحب الرسم وكان يرسم أفراد العائلة فى وقت فراغه كنت بحس أنه بيلاقي نفسه فى الرسم كل ما يبقى فاضى كان يمسك قلم ويقد يرسم". وتابعت "بصراحة فى البداية كنت غير مهتمة وكان تركيزى معه أكثر فى الدراسة والتمارين بالرغم أنى كنت ملاحظة تلوينه جميل لكن كنت فاكرة إنه عادى طفل بيحب يلون لكن بعد فترة بدأت أركز معه حسيت إنه مش بيعرف يلاقى نفسه غير فى الرسم. وأوضحت: كنت بحاول أساعده يكون كل تركيزه بالتمارين والدراسة لكن هو كان رافض وملعبش ولا تمارين فيهم لكن كنت بحسه مضغوط ومش مبسوط وقتها فكرت امشي بدماغه هو وتفكيره وأحاول أكون معه فى الحاجة اللى يحبها وبعدها بدأت أركز أكتر فى الحاجة اللى بيحبها وحسيته اتغير وبدأ يكون مبسوط بدأت أركز مع هوايته من حوالى 6 شهور فقط بعدها اتحول 180 درجة نفسيته بقيت أفضل وهو اتحسن جدًا". وتقول: "مالك يعشق كرة القدم فبدأ يرسم بعض شخصيات اللاعبين كل شخصية تعجبه يرسمها والرسمة كانت ممكن تستغرق منة نصف ساعة فقط بالرغم من صغر عمره لكن هو بيحب الرسم علشان كده قادر أن يبدع. وتنهى كلامها: "أنا مبسوطة جدًا وأمنيتي إنه يكبر ويكون أشهر رسام ومبسوطة أكتر أنى حاولت أساعده يشتغل على الحاجة اللى بيحبها وقتها فهمت أن الطفل ماينفعش نعند معه بل بالعكس من الأفضل نسعى وندور على الحاجة اللى بيحبها وأساعده يطور نفسه.