هاجم محمد العجمى، شقيق مصمم الأزياء أحمد العجمى، زوج البلوجر أحلام عادل، بعض الأشخاص الذى أكد أنهم كانوا يرغبون فى خراب بيت شقيقه، وقال: "موقف زى اللى حصل لأحمد أخويا، وأحلام، خلى ناس كتير ظهرت على حقيقتها، ناس عايزه تخرب بيت اتنين بيحبوا بعض".
وأضاف محمد العجمى، في تدوينه عبر خاصية "ستورى" حسابه بموقع "إنستجرام"، "ناس عايزه تظهر على الساحة وخلاص عشان شويه لايكات، وشوفت كمية استوريهات عاملة تاج لأحلام عشان أحلام تقبل وتنزلها عندها عشان هم يجمعوا لايكات ولا الريتش بتاعهم يعلى شويه".
وتابع: "أحلام، من أحب الناس لقلبنا وأختنا بمعنى الكلمة والله العظيم ربنا عالم ربنا يارب يهديكم لبعض وتعيشوا فى سعادة"، وأضاف: "طبعا بشكر كل الناس اللى دخلت ع الخاص وكلمتنى تطمن على أحمد وأحلام، وتدعيلهم بفضل الله ولا شخص كلمنى شتم ولا سب ولا ايه كلمه جارحة والله العظيم، شكرا كل شخص ابن أصول متربى صح".
يأتي هذا بعدما أثار خبر طلاق البلوجر أحلام عادل صبحى من مصمم الأزياء أحمد العجمى بعد نحو شهرين من زواجهما، ضجة كبيرة عبر منصات السوشيال ميديا ومواقع التواصل الاجتماعي، حيث أثار اهتمام كبير من رواد ومتابعى هذه المنصات الذين أبدوا الكثير منهم التعاطف معها، خاصة بعدما كشفت البلوجر أن سبب طلاقها هو شراء عدد من سجاجيد الصلاة "مصليات" لعدد من أصدقائها خلال تواجدها فى الأراضى المقدسة لأداء مناسك العمرة.
وبعد خروج أحلام، لسرد التفاصيل، ظهر زوجها من خلال السوشيال، ليرد عليها ويعتذر لها عما حدث، قائلا من خلال فيديو: "يا أحلام حقك عليا، أنا أسف وغلطان فى حقك..أول مرة أعمل فيديو وأطلع اتكلم فيه، حصل بينى وبين أحلام شد فى العمرة، خلاف وشديتها وزقيتها وده مكنش لازم يحصل خالص، لما رجعنا من العمرة صالحتها وكنا كويسين، وبعدين حصل خلاف تاني، وزعلت منى وافتكرت كل اللى كنت بعمله".
وأضاف أحمد العجمى زوج أحلام: "أتمنى متزعلش منى والدنيا تروق وتدعولنا بأن ربنا يصلح الحال إن شاء الله، هى سنة أولى جواز فيها شد وكل حاجة، ولسه فى طباع وعيلتين بيتعرفوا على بعض، وبنطبع على طباع بعض وربنا ييسر الدنيا، هروح لحد متخصص وأعرف ازاى نتعامل مع بعض ونتفاهم سوا، أدعولنا ربنا يهدينا، الكلمة الكويسة بتفرق".
والبداية عندما ظهرت أحلام، فى فيديو نشرته عبر ستورى حسابها على انستجرام، كشفت فيه عن سبب طلاقها، وعلقت عليه بالقول: "أنا رجعت من العمرة مضروبة ومطلقة عشان جبت مصليات لزمايلى الولاد والبنات"، مضيفة: "ملحوظة كانت مصلية مش ازازة خمرة".
وتعاطف الأصدقاء والمتابعون، مع أحلام عقب إعلان طلاقها، حيث قال أحد متابعيها: "ممكن ندعى لأحلام ان ربنا يهون عليها أى وجع حاسه بيه لأنها بتمر بوقت يمكن من أصعب الأوقات اللى ممكن تيجى على شخص فى الدنيا دي، انتى شخص كويس ومحدش عمره شاف منك حاجة وحشه ولعله اختبار من ربنا ويعدى إن شاء الله وكلنا جنبك".
فيما رأى البعض الآخر، أنه من الممكن أن تكون حيلة واختراع قصة جديدة لزيادة التفاعل والشهرة، خاصة أن سبب الطلاق غير مبرر من وجهة نظرهم، وأنهما يريدان تسليط الأنظار عليهما ويكونان محط اهتمام الجميع.
