"ميرهان" بترسم المشاهير بنول الخرز الملون وعملت لوحة لنويل روبنسون هدية

عشقت الأعمال اليدوية منذ نعومة أظافرها، وخاصة الرسم على النول، مما دفعها للاطلاع على كل ماهو جديد فيه، والتطوير من نفسها، كما رسمت الكثير من المشاهير بالنول منهم محمد هنيدى في دوره بمسرحية ألابندا، وهالة صدقى في دور الملكة صفصف بمسلسل جعفر العمدة و التيك توكر نويل روبنسون، الذى صممت له لوحة و أهدتها له. تحدثت ميرهان حسني البالغة من العمر 27 عاما، خريجة كلية تربية نوعية جامعة بورسعيد، ومصممة هاند ميد، لـ" انفراد"، عن بداية عملها بهذا المجال حيث قالت:" اتعلمت نول الخرز خلال دراستى بالكلية، وهو مش الفن الوحيد اللي بشتغله حالياً لكن هو من الفنون اللى بحب اشتغلها، بالإضافة إلى إنى بشتغل كروشيه وتريكو وتطريز وخرز ورسم، والحقيقة أن بداية حبى للرسم والأعمال اليدوية بدأت من وأنا عندى 6 سنين ومن وقتها وأنا بتعلم وبطور من نفسى". وعن أعمالها الفنية، قالت :"معظم لوحاتى لشخصيات مشهورة وأغلبهم ممثلين ومغنيين كوريين، وأتذكر أول بورتريه عملته كان للمغنى جيمين من فرقة BTS و المصريين، عملت لوحة للفنان محمد هنيدي بشخصيته في ألابندا والفنانة هاله صدقي بشخصيتها الملكة صفصف في مسلسل جعفر العمدة، و زين مالك توم هولاند وصممت لوحة بعيون شخصيات كرتونية زى الأميرة ياسمين من كارتون علاء الدين ". وعن كواليس تصميمها للوحة للتيك توكر نويل روبنسون، قالت :"لما عرفت إنه هيزور مصر، عملت بورتريه له، لأن حسيتها هتكون لفتة لطيفة وهدية له، وهو كان شاهد الفيديوهات اللي نشرتها للوحة، لأن متابعينى عمله منشن له وعلق على الفيديوهات إنها عجبته ولما عرفت إنه في بورسعيد حاولت أتواصل معاه والمرافقين له وعرفت مكانهم ولما قابلته كان لطيف واتفاجئت إنه فاكر الفيديوهات ولما طلبت اتصور معاه فيديو رحب جداً و طلب أن الفيديو يكون باللوحة الهدية عشان الناس تشوفها". وعن الصعوبات التي تواجهها أثناء عملها، قالت :" فيه صعوبات كتير قابلتنى لكن الحمد لله اتغلبت عليها بس فيه صعوبات لسه متغلبتش عليها وهى إن الشغل متعب وبياخد وقت طويل جداً، وبرضه الخامات في بورسعيد مش متوفرة أوي". تابعت :" فكرة البورتريه بنول الخرز جديدة وحسب بحثي مفيش حد في مصر بيعملها واللي بيعملوها برا قليلين، لكن في الـ6 شهور اللي فاتوا كنت بحاول أغير في تكنيك ألوان الصورة مش بس أعمل البورتريه بألوان البشرة، كنت بستعين في شغلي بفنون زي البوب آرت ". وختمت ميرهان حديثها معبرة عن أحلامها قائلة :"أنا نفسي أكون معروفة علي مستوي العالم ولوحي تتعامل معامله لوح ليوناردو دا فينشي وفان جوج لأنهم من الفنانين المفضلين بالنسبة لى".