وجهت الفنانة إيمى سالم، مجموعة من النصائح للأمهات اللواتى رزقن بأطفال توأم، عبر حسابها الشخصى على موقع "سناب شات"، بطريقة كوميدية وساخرة، وذلك استجابة لمطالب متابعيها الذين طالبوها بهذا الأمر نظرًا لأنها أم لتوأم.
وكانت أولى نصائح سالم، لأمهات التوآم :"أول حاجة تعرفى إنك هتشتمى كتير، وتانى حاجة لازم تستخدمى أدوية الصداع لأنك هتبقى أكبر مستهلك ليها فى البيت، كما أنها دائمًا فى حالة عصبية".
وتابعت :"لو إنتى من النوع اللى بيتخنق بسرعة فهتحسى بحالة فظيعة من الملل، لإنك هتعملى الحاجة مرتين، وممكن تعمليها مرتين فى نفس ذات اللحظة".
وأضافت :"متحاوليش تحطى أى حاجة على الترابيزة أو فوق الكومدينو أو الدولاب، لأنهم هيعرفوا يوصلولها، ، مفاهيم كتيرة فى حياتك هتتغير، مفهوم كلمة طفولة ومفهوم كلمة نوم، ومفهوم كلمة راحة".
وواصلت إيمى :"الحاجات دى ممكن تشوفيها سلبيات، لكنها فى الحقيقة إيجابيات، لأنك بعون الله ب ضمننتى جنتك، حاجة تانية إيجابية إنك بتستغفرى ربنا كتير، على طول بتقولى استغفر الله العظيم".
وتابعت :"ربنا يكون فى عون كل اللى مخلفة توأم، لأن محدش بيحس بيها غير اللى مخلفة زيها، خصوصا لو صبيان، لطاف قوى".
واعتبرت سالم، أن كلمة "ماما"، من الكلمات اللطيفة التى تتمناها كل أم، إلا أن "أم التوأم بيبقى ليها وجهة نظر تانية بعد ما بيعدى سنة ونص أو سنتين على الخلفة" على حد تعبيرها.
وقالت إيمى :"مرحلة البرود دى بتيجى بعد 3 سنين من خلفة التوأم، بتبقى باردة جدًا لو حد بيصوت بيعيط إنتى ما بتسمعيش تقريبًا، أما ترمومتر الشحتفة فى انخفاض غير طبيعى صيفًا وشتاءً فى جميع الفصول، ولكل واحدة ناوية يكون عندها توأم فكرى كويس حبيبتى".