السيد موسى يكتب: الوجه الذى تستحق

فى مثل إنجليزى من العيار الثقيل بيقول: "بعد سن الأربعين أنت تحصل على الوجه الذى تستحق".

لما قريت المثل ده افتكرتها فعلاً....هى فى عمر أمهاتنا بس شوف عاملة إزاى دلوقتي، ممكن تكون شباب أكتر من معظمنا.

ماما نجوى الجميلة، ليها برنامج فى الراديو على نجوم إف إم...إسمه بيت العز.... الست دى لما بسمعها بحس بسعادة غامرة بكل ما تحمله الكلمة من معنى وفعلاً مش قادر أعرف السبب....حاجة كدة زى الهواء النقي.

فى حقيقه مفيهاش أى شك.... إنت فعلاً هتكون الشخص اللى إنت تستحقه فى الشكل والمضمون بعد سن الأربعين وممكن دلوقتى تاخد القرار وتختار: 1-تاخد بالك من أكلك وتقلل الدهون والسكريات وتشرب مياه كتير وتاكل كل يوم فاكهه وخضروات وتلعب رياضة ولا هتقضيها فاست فود! 2-تتفائل وتبتسم وتحسن الظن بالله ولا هتقعد خايف ومتشائم وقارف نفسك! 3-تحفظ كل يوم آيتين من القرآن وهتلاقى نفسك حافظه بعد 9 سنين ولا هتقعد تتمنى بس ومتعملش حاجة! 4-تقرأ وتتعلم وتطور من نفسك ولا هتفضل ثابت مكانك (بالمناسبة مفيش حد بيثبت لإما هتبقى أسوأ أو أحسن)! 5- هتقدر تحوش ومش كل ما تعجبك حاجة تشتريها وتقسم فلوسك حتى لو حاجة بسيطة......(مصاريف-توفير-استثمار) ولا هتصرف ما فى الجيب...يأتيك ما فى الغيب! 6-تقعد مع أطفالك وتهتم بيهم وترعاهم وتربيهم ولا هتسيبهم وتتفاجئ بيهم بعد ما توصل إنت للأربعين! 7-هتقعد تحط الناس المؤذية فى دماغك ولا هتتجاهلم أكنهم مش موجودين أصلاً! معظمنا فى التلاتينات........... عشر سنين ممكن تعمل فيهم كتييييير.