الساعة دقّت
غُربة بالظبط..إلا ليلة
والدقايق ماشية بتعافر تقيلة
عقربين يتلاقوا سهوة ويحضنوا
اللي باقي م الأماني المستحيلة
والشنط مرصوصة حزنك
ع الأرض مستنية ايدك
خدت ايه غير حلم نازف
دم من اوصال وريدك
تذكرة طيران وفيزا
ودمعتين ف عيوني ميزة
وضحكة باهتة من شفايفي بتنتحر
بصوت رسالة جاية فجأة من بريدك
اوعى تنسى حاجة مني
وانت بتلملم ف روحك
خد معاك من حسن ظني
وسيبلي حفنة من جروحك
هلتقيها بخيط وابرة
شاطرة انا ف تخييط جراحك
وع الجراح انا برضه صابرة
واوعى تنسى ف جيب مشاعرك
ليلة مرت بينا عابرة
خد معاك صورتي الجميلة
وسيبلي منك...بس ليلة