كلنا موجود فى حياتنا الشخص اللى دايما معانا.. اللى دايما ورانا ..اللى دايما بيطيب ..اللى دايما بيطبطب ..اللى عمره ما أتخلى عنك وقت ضيقة ..اللى وقت حزنك اخترع ألف طريقة .. القلب المليان حب .. قلب جدع بجد .. عمره مادور هياخد ايه من وراك .. عمره مافكر انت شايله ايه جواك .. من غير ما تسرح وتدور كتير .. والله انت عارفه مش محتاجه تفكير ..
فعلا فى حياتنا كلنا الشخص ده موجود سواء كان ..أو .. أو ..أو.. و هقول الخ .. ولسه فيه كتير أصلا ههههه. مش مهم هو مين ولا مهم هو فين لكن الكارثة الكبرى اننا كلنا بنتعامل مع الشخص ده بمنتهى الحجود .. إلا ما رحم ربى .. ليه مستغرب من كلامى .. والله لو ركزت فى حياتك وقربت شوية صغيرين من تجارب الناس على اختلاف أشكالهم و ألوانهم هتلاقى أن دايما الشخص ده بتتعامل مع حبه ليك كأنه حق مكتسب أو لعبة شايلها فى جيبك لو حبيت تتسلى بيها دلوقتى هتبقى آخر انسجام ولو مش عايز أهى جنب أى كراكيب مرمية هتلاقيها وقت ما تنضف أوضتك .
هو ده بالظبط اللى بيحصل الشخص ده موجود لو أنا مجروح هيطيب لو أنا مخنوق هرنله ولو أنا تمام وزى الفل خلاص أهو موجود لوقت الزنقة .
ليه بجد بنتعامل كده مع الناس اللى بيحبونا و نجرى ورا اللى يهنا و يبهدلنا و يجرحنا و نستنى رسالته لما يفضى و مكالمته لما يكون مش لاقى حاجة يعملها و خروجة معاه لما تضيق الدنيا بيه و مش يبقى قدامه غيرنا
على فكرة الموضوع كله سد خانة و انت يالواحد الصحيح فى المسألة دى يالصفر اللى على الشمال وكلنا كده مع تبادل الخانات شوية ليك و شوية عليك
انت حاسبت نفسك ووقفت معاها وقفة صح ترضى ربنا وقولت أنا عملت ايه للأشخاص اللى بيحبونى قدمتلهم ايه والله هما كانوا معايا ومتخلوش عنى فى مرضى أو وقفوا وفرحولى فى فرحى والأمثلة كثيرة والخ برده ... لكن أنا عملتلهم ايه والله لو لقيت نفسك فل وتمام و عمرك ما قصرت فى حق حد بجد حبك يبقى بجد شابوه ليك والكلام ده مش يخصك إنما تتحجج بالظروف و تقول والله مش بإيدى وهى ظروفى كانت كده يبقى سورى اخص عليك
عارف لو عملت اللى كان بإيدك بجد عمرك ماهتقصر مع حد بجد حبك المشكلة مش هنا المشكلة ان الشخص ده بيحس أنه عمل كتير قوى وعطالك من قلبه و وقته كتير قوى وانت جاحد لكل ده النتيجة أنه هيبعد هيمشى قلبه هيتقفل تجاهك و عمرك ماهترجعه ليك زى الأول .
مش بالضرورة يكون قلبه أسود ولا بيشيل هو زى ماهو لكن انت مش بقيت جواه زى ماانت . بالله عليك لو عندك حد بيحبك بجد فى حياتك حافظ عليه اوعى تضيعه من ايدك اوعى تندم بعد فوات الآوان كلنا بشر وكلنا بنغلط لامحاله لكن قبل مالوقت يفوتك فوق و اعترف بتقصيرك وبإهمالك احنا خلاص وصلنا لمرحلة ان كلنا بنشتكى من بعض وكلنا شايلين من بعض وماليين الأرض وباء ونكد وأنا نفسى أسأل من زمان مادام كلنا ضحايا كده فين الجانى ياجدعان ؟
امسكوا ايد الناس اللى بتحبكم واعرفوا بجد ان الحياة من غيرهم مالهاش لازمة .
آه قبل ماأنسى أنا كتبت بالعامية علشان حسيت انها هتوصلكم أكتر .
بس كده ...