ناس كتيرة لما بتسمع كلمة بخيل بتفتكر ان الشخص البخيل هو اللى مَش بيحب يصرف فلوسه وانه بيحرم نفسه واللى بيكون عايش معاه من حاجات كتير اوى حتى لو كانت ضرورية لمجرد انه خايف يصرف اللى معاه كله وفلوسه تخلص وهنا مَش بيكون حريص بس زى باقى البشر لان الحرص حاجة عادية ومش بتأذى حد لكن ده بيبقى إنسان بخيل وناس كتير بيعتبروه مريض بداء البخل وده المعنى المتداول للبخل لكن البخل ده ليه أشكال مختلفة زى البخل فى المشاعر لما يكون الانسان مَش بيعبر عن مشاعره وإحساسه للأشخاص اللى حواليه ومَش بيقدر الناس اللى بيتعامل معاهم بيديهم قيمتهم بخيل فى مشاعره يفتقد القدرة على مشاركة الناس فى التعبير عن احساسه تجاههم سواء مبسوط او زعلان منهم بيحبهم او بيكرههم متقبِّل وجودهم أو رافضه الانسان ده احيانا مَش بيكون قليل الكلام وقليل الذوق فقط ده بيكون بخيل فى مشاعره وإحساسه بالآخرين والصفات دى بتخلى الناس تبعد عنه وتنفر من جموده وجحود قلبه وبيتجنبوا التعامل معاه .
وفِى بخل من نوع اخر وده احيانا بيكون إنسان كريم جدا فى الناحية المادية وعنده القدرة فى التعبير عن مشاعره وبيتعامل مع الآخرين بذوق وترحاب ولكن بيبخل على اللى حواليه بالمعلومة او اَى شئ يفيد اَى شخص حتى لو عرف ان الشخص ده محتاج لمعلومة او نَصِيْحة فى موضوع ما لكن البخيل ده مَش بيشارك الآخرين باى حاجة تفيدهم بيبقى فاكر انه لما يدلهم على معلومة عن حاجة استفاد بيها كده حيبقوا احسن منه ويسبقوه ويحققوا استفادة اكتر منه فى ناس كتيرة كده ماتحبش تفيد حد باى حاجة سواء كانت حتعود عليهم بمنفعة وهو فى نفس الوقت مَش حيتضرر من اخبارهم او حاجة تأثر عليه وعلى مصلحته الشخصية لكن ده بيكون بخيل وأنانى ومش بيحب الا مصلحته فقط وبيكره الخير للناس ومش فارق عنده حد يكون محتاج المعلومة دى سواء كانت طبية وحيفيد بيها مريض ويكون سبب فى شفاؤه او شخص فى مشكلة ما ومحتاج نصيحة ينور بيها بصيرته ويرشد بيها عقلة بتصرف يخرجه من المشكلة دى فمن وجهة نظرى ان اسوء وأشر انواع البخل هو البخيل ده اللى بيمنع نفسه عن مساعدة حد محتاج مساعدة ويبخل على غيره بكلمة ممكن تفرق معاه فى حاجات كتير البخل مش بس فى الفلوس لا ده كمان بخل فى الطباع والمشاعر والرحمة والإنسانية وحاجات كتيرة أوى .