إبراهيم خلف يكتب: النهايات أخلاق‎

فى حياة كل منا علاقات صداقة أو حب أو ارتباط، بكافة أنواعها، لما تحس أنك محتاج تنهى علاقتك بحد، متاخٌدهاش خبط لزق، استنى جنبه وسيبه يساعدك، علشان طالما وصلت لمرحلة أنك قررت تبعد أو اقتنعت أن البعد واجب، كل حاجة و أى حاجة منه هتبقى بتساعدك. سيبه يخيب ظنك ويخذلك واحدة واحدة، يقل من نظرك واحدة واحدة، يوجعك واحدة واحدة، يبعدك عنه واحدة واحدة. ساعتها بس هتحس أنك استنفدت كل طاقتك معه والبعد مش هيبقى قرار بيوجع هيبقى مشيئة مريحه، سيبه يدمر كل فرصه له بالبطىء وهتلاقى وجوده وغلاوته بتتلاشى من كيانك واحدة واحدة، بدون وجع أو تأنيب ضمير أو حكم للعشرة. هتمشى وأنت مش ندمان ولا هتبص وراك لأنه ببساطة هو اللى عمل كده وساعدك تخرجه من حياتك، الناس هى اللى بتحط نفسها فى الأماكن فى قلوبنا وحياتنا بتصرفاتها مش بكلامها أو باختيارنا.