القارئ عبد الله السيد الشيخ سليمان يكتب: مبستريحلكش

الليلة غير كل ليلة الليلة مر على مُر كلامك تَلَت سنين ونُص ورغم طول المدة إلا إنى لسه فاكر كلامك وحافظه بالنَص ولسه فاكر السنة واليوم والتاريخ والوقت ولسه بندم إنى مشيت فى سكتك وبدأت لكن وعد شرف منى م الليلة هعتزل غرامِك لكن بعد أما أفكرك بكلامِك فاكرة يومها....... وهتفتكرى ليه ما أنا الواد الفلاح مش البيه لكن الليلة هفكرك بحاجات عبارة عن مُر مَر عليها سنين من ضمنهم كلمة سهمها صاب قلبى فقسمة نصين فمن يومها وأنا شايل الكلمة فى برواز م أنا من يومها لحد الليلة لا لاقى لقلبى سند ولا حتى عكاز ف إيه لازمته تكسرى خاطرى بكلمة لحد الليلة سمها لسى سارح فيا والله ليليتها بكَى قلبى ومبكتش عينيا ف إيه لازمته تقولى مش ذنبى إن مبحبكش وإن الأرواح جنود مُجندة وأنا والله للأسف مبستريحلكش ساعتها لمحت الحزن بيحُوم حواليا والرعشة اتملكت من جسمى خاصة إيديا وأصبحت عاجز عن الرد والكلام فقررت أنسحب بهدوء تام وألِم اللى باقى منى دا لو كان باقى منى شىء ما سهمها صاب قلبى وأصبحت بموت بالبطىء ورفضت حتى تسعفنى بكلمة حلوة تُجبر الخاطر فتقلل من الحزن اللى عليا إتكاتر لكن سابتنى تايه جوه كلامها وكإنى أعمى مش لاقى اللى يسحبنى وأنا أهو من يومها لحد الليلة لسة بحاسبنى لسه بحاسب نفسى ع الحزن اللى بسببها أصبح ساكن ملامحى لسه بكابر قصاد العالم وبدارى جرحى لسه بعاتب نفسى وسط ظلام الليل وسكونة إحساس صعب إنك تحب بإخلاص وتنجرح فطبيعى العقل يتجن جنونة ويحاسب نفسة بدل المرة ألف وإنتى مش مجرد غلطة أنا غلطها إنتى وقعة الشاطر اللى بألف ولو ع الجروح فهتاخد وقتها حتى لو ظلت بدل السنة ألف وأهو عيبى إن يوم كلامك عقلى مستوعبش وقلبى مصدقش يومها قولتى إن الأرواح جنود مُجندة وأنا والله للأسف مبستريحلكش ساعتها افتكرت كلامهم لما قالوا لا هى شبهك ولا من توبك وغرور أسلوبها عكس تواضع أسلوبك فبلاش تقرب يا ابنى م البداية إبعد وإنجد بروحك من عذاب النهاية واتأكد إنك تستاهل أفضل منها ومسير الحب يجمعك بواحدة فيها خير عنها واحدة مهما تحزن قلبها قلب طفلة تحسها أم وحبيبة وصديق تقدر تستحملك وقت الضيق وتعيش معاك ع المُرة قبل الحلوة واحدة يعجز عن وصفها قصيدة أو غنوة وتكون مؤمنة بالحب زى حالاتك واحدة جمال روحها يشبه جمال السما الصافية وصِفاتها من صِفاتك وتكون غير باقى البشر تكون مِنة من ربنا ليك تلمح حبها ليك في عنيها وتلاحظ خوفك عليها فى عنيك ففعلًا لا إنتىى شبهى ولا أنا مكتوب على جبينك ولا إنتى مكتوبة على جبينى لكن الفرق بينك وبينى إنك في غيابي وبختينى وأنا في غيابك صونتك وعملت حساب إنك كنتي في يوم من الأيام تهميني لكن خلاص م الليلة هفوق من وهم الماضي وهشوفك بعينيا شىء عادى لا قلبي هيدق بسرعة أول ما يلمح طيفك ولا هقرب منك فنجرح من نصلك وسيفك وأنا مسامح لو كنتى خدتي من عمري ربيعى وسيبتيلى خريفك وكفاية عليا التجربة اتعلمت منها كتير واتكدت إن مجروح الحب مافيش لجرحة إكسير وإن الكلمة الواحدة بتغير الحال وأنا أهو.......... من يوم كلامك وأنا حالى غير الحال لكن أوعى تنسى إن دوام الحال أمر مُحال وأنا واثق من إن مسير الصدفة هتجمعنا فى مكان وهتلاحظى إنى شخص تانى غير اللى داب فيكى زمان لا هو ملهوف عليكى ولا هيغرق فيكى وقت السلام لما إيديه تلمس إيديكى وهلاحظ إنك حزينة مكسورة الخاطر من شخص حبتيه فرماكي وقدرتيه فنساكي وراح لغيرك ساعتها وارد يصحى ضميرك ويأنبك عل جرح جرحتيه لشخص من يومها لحد الليلة عايش في حرب استحالة يزورها السلام فهسيبك لندمك وهمُر عليكى مرور الكِرام لا ههتم لشكلك ولا حتى لريحة برفانك ولا هيكون عندى فضول أعرف مين خانك وكفاية عليا إن حبيت وإتنسيت بعد ما ضحيت وياريتنى ارتحت لما اشتكيت فنصيحة منى بلاش تشتكى الشكوة مبتريحش ولا بداوي جرح قديم وإياك لغير ربك تشتكي دا كلنا مجاريح ومافيش فينا حد سليم وغير كل ده الشكوة لغير الله مذلة كتير بنشتكي لأشخاص خطأ فتزيد الجروح وتزيد العِلل عِلة ونصيحة مني ودا الأهم بلاش كسر خواطر ومتتغرش إن كنت شاطر صدقني ما بيقع إلا الشاطر وأنا عندك أهوو..... مكسور خاطري بقالوا سنين من كلمة إتقالت وسط كلام وإتغروا في الهيبة اللي أنا عليها وأنا أصلًا عايش والسلام فلو كانت الأحزان لغم فكسر الخواطر ألغام ف إياكم وكسر الخواطر وإياكم تصدقوا إن مكسور الخاطر بتُجبُره الأيام