سيد منير عطية يكتب: منتهى اللذّة

ولسّه الحب جوايا طيور جنّه ولسّه يا روحى بتمنّى أكون جنبك ما زال كل المُنى حُبك ف ليه شايفك...

ف عز نهارى بتشدّي خيوط الشمس للمغرب ؟ وليه لحظة ما اقربلك ألاقى نظرتك تهرب ؟ وليه سايبه الغرام يتعب بطول البُعد؟ دنا قلبى جناين ورد زارعهالك حروف أشواق وبسقيها بقنانى الود وانا أول ما اقوم م النوم بقول إسمِك متين مرّه كأنه فوق لسانى وِرد ف ليه وقت انهمار الشوق بتبنى ف الطريق السد ؟! تعالى نزغزغ الأحلام فتضحك والغرام يتمد دنا عمرى ما خونت العهد ولا بصّيت على غيرك واشوفك حلم جوّه الحلم وانام أحلم بتفسيرك وتفضل منتهى اللذّة ف لحظة لمّا اقوم م النوم واشم النسمه بعبيرك ف ليه دايما بشوفنى بعيد وخارج برّه تفكيرك ؟ وليه وقت ابتسام الروح بترمى عليها تكشيرك؟ّ دنا عمرى ما كنت مُباح سوى ليكي وطول عمرى بغنّيكي بلحن يميل على حُسنه جموع الإنس ويّا الجان ولا عمرى داريت الشوق مابين الصمت والنسيان أنا إنسان بيملانى الحنين ليكي ويرسم صوره بالألوان وتفضل ضحكتك مطره وانا قلبى الكبير فيضان وشايفك بين عيون الحور وشايفك نور ولو كاس الفراق بيدور بقوم اعمل عليه عِصيان تعالى وخُشّى جوايا هتلقى الحب ف الشريان ولو كان الغرام جنّه أنا واقف هناك.. رضوان