القارئة سلوي محمود تكتب: بواقى غربة

من أعراض الانسحاب للاغتراب .......الاكتئاب حاجة تشبه جلد ذات اجترار مر السنين اللي فاتت كالساعات تملا صدرك بالهوا لاخر نفس تتحرر الروح م القيود ويا الفؤاد اللي انحبس تتفرد... والضهر محني بالهموم وتلاقي اتمان غربتك ...حبة هدوم لا وقفت ليلة ف دايرة الساقية الطويلة ولا عيشت حتى ف جنتك ان شالله يوم ترجع معاك ......كيسة دواك وياها احلام ممكنة تمنعها خالص م الحدوث بالمرة امراض مزمنة متمكنة أصل الحصيلة كلها كم صفر شايله معاك حلال لو طرحت منهم العمر اللي راح حتلاقيهم ع الشمال واطرح معاهم حضرتك كل اللي راحوا ف سكتك أمك.... أبوك وعيلتك اللي اتعودت على غربتك من غير وصال ترجع لنقطة البداية أول ما بدأت الحكاية ...للنهاية وتعيد ف نفس القصة تااااااني ف كل مرة متبدلة بكل احتمال واوعاك تفكر ان التقاعد شيء مريح تفضل تدور حوالين حياتك تبكي كالأسد الجريح خليك صريح واعترف إنك بتستنى ف طابور متأكد إن حييجي دور وحتبقى شايف كل اللي حاصل وبعنيك كل اللي ضاع عمرك عليهم بكتيره مصمصة الشفايف لا دي حتى كتير عليك