إكرام عصام يكتب: أصله اتغير أوى بعد الجواز

جملة بنسمعها كتير من ناس كتير نعرفهم .. فى كل مشكلة بتقابلهم فى حياتهم مع شريك حياتهم .. فلما تسأل طيب هو مش انتى عارفة أن دا طبعة قبل ما تتجوزى ترد بمنتهى التلقائية وتقولك أصله اتغير بعد الجواز هو ما كنش كدة دا بقى عصبى، بخيل، ماعندهوش طموح، مش متحمل المسئولية .. فى الحالة دى أحب أقولك لا هو ما اتغيرش ولا حاجة هو كان كدة اصلا وفى حالة انك مش عارفة دا بيجى هنا سؤال مهم آمال انتوا كنتوا بتعملوا إيه فى فترة الخطوبة؟ فترة الخطوبة.. هى الفترة اللى المفروض كل طرف فيها بيحاول يعرف الطرف الآخر .. ودا بيكون عن طريق مواقف بتحصل بطريقة طبيعية أو حتى مفتعلة ومقصودة . فمعنى انك ما قدرتيش توصلى للمعلومات أو الطباع بتاعت الطرف الآخر واللى بعد الجواز بتبقى بحكم العشرة والايام هى دى طريقة التعامل وطريقة الحياة بينكوا يبقى فترة الخطوبة دى ضاعت بلا هدف. نيجى بقى لسؤال تانى حيثبت لك أن الكلام ده صح ومنطقى وهو أنه هل فى حد بيتغير بين يوم وليلة ؟ يعنى لو واحد بخيل عايز يبقى كريم حيعرف يعمل ده بمنتهى السهولة كدة اللى تخلى يتغير بعد الجواز ؟ الاجابة ... لا طبعا، لأن منطقيا التغير محتاج وقت ومجهود فمعنى كدة أنه علشان تقولى أنه اتغير معنى كدة مثلا أنه هو كان شخص كريم وقرر أنه يبقى بخيل واشتغل على نفسه وعمل مجهود علشان دا يحصل .. ودا فى الطبيعى شئ صعب جدا لان الصفة الإيجابية زى الكرم والطيبة والحنية والذكاء صعب جدا أن الشخص يغيرهم . آمال آية اللى حصل طيب ... اللى حصل أنه الشريك اصلا كان دا طبعة ودى صفته من البداية بس انت كشريك ماقدرتش انك تكتشف دا فى فترة الخطوبة ... أو أنك كنت عارفة وغمضت عينك ورضيت بيه على اساس انك حتغيره بعد الجواز وفى كلا الاحتمالين أنت برضوا اللى غلطان لأن: أولا: أنت قصرت فى حق نفسك بأنك تاخد وقتك وتختار صح الشريك اللى حتبقى مرتاح فى علاقتك معاه . ثانيا : أنت أقنعت نفسك بفكرة مالهاش وجود وهى انك حتغير شريك حياتك علشان يبقى على مقاسك .. ودا طبعا مش من اختصاصك كشريك لأن المفروض انك تقبل شريكك زى ماهو على بعضه يا تقبله على بعضه يا ترفضه على بعضه. طيب نعمل ايه بقى دلوقتى الحياة بقت صعبة وبقى عندى مشكله مع شريك حياتى ومش عارف اتاقلم ؟ الحل بسيط جدا ...تقبل شريكك زى ماهو و بطل تركز على الصفات السيئة اللى مش عجباك فى شريكك . هات ورقة وقلم واكتب الصفات الحلوة اللى بتحبها فى شريكك و أبدأ ركز عليها وامدحه على الحاجات دى حتلاقيها بتكتر واحدة واحدة لحد ما تغطى على الصفات الثانية اللى انت رافضها .