أيها السعر الممتنع العنيد
خليتنى أجرى وراك والعرق منى بيصُب
لقيتك منتشى سعيد
قلت لى أنا جاى عندكم طالب القُرب
قلت له أن كنت فعلاً لهذا جاى
هل جاى عن اقتناع وعن حُب؟
وإن كان غرضك شريف
تعالى وقرب مننا ومن عليائك انزل وطُب
العملية مش ناقصة غُلب
إن ريحت بالنا واتفقنا وشربنا مع بعض شوب
حنفرح بيك ونططك ونشيلك هيلا هوب
كل بالاتفاق والحب يكون القُرب
صارحنا إيه غيرك إحنا عن بعض مش غُرب
نفس الخامة ونفس الفولة ونفس القشرة واللُب
ملكش حِجة علشان تقوم لفوق تُهب
وتجى تعمل علينا فى حارة المصريين فيلم رُعب
وترمى كرسى فى الكلوب
وتقلب الموازين وتخلى الكفة تُطب ناحية الدُب
معندناش حصالة بنفرغ منها ونُكب
والمرتب بينقط مش بيصُب
ولو مش ناوى تنزل يا ريت تثبت ومحلك سِر ودُب
ولا تكهرب منظومة البيع والشراء
لأنك فى دائرتها أكبر قُطب
لا غنى لمخلوق عنها من عجم وعُرب
*****