إكرام عصام يكتب: وحدى لكن ونسان

يعنى إيه ؟ الإحساس فى المرحلة دى قمة الراحة والسلام النفسى إنك تبقى مرتاح ومكتفى بنفسك وتقدر تشبع نفسك نفسيا بشكل يوصلك للراحة والسلام وانت مع نفسك. طيب هو ينفع أى حد يعمل كده؟ أيوة طبعا ينفع بس الموضوع محتاج شوية تدريب .. 1 - اتخلص من مشاعرك السلبية تجاه ذاتك .. إحنا عاملين زى الكوباية ما ينفعش نملى الكوباية وهى مليانة أصلا ... لازم نفضيها علشان ينفع تتملى ... علشان كده حنعمل حاجة بسيطة ... هات ورقة وقلم واقسم الورقة نصين، نص اكتب فيه مميزاتك والنص الثانى اكتب فيه عيوبك .. بصلهم كويس واقبلهم زى ما هما ... وخليك عارف إن ده الطبيعى ومافيش شخص ملاك وماعندوش عيوب ... اكتب المواقف اللى حصلتلك ولومت نفسك فيها وابدأ ناقشها مع نفسك وطلع الحاجات الحلوة اللى فى المواقف دى ... سامح نفسك على المواقف اللى انت شايفها غلط ودا حيخلى عندك القدرة على تقوية نقطك الإيجابية وتزويدها ... كفاية تجلد نفسك على حاجات خلصت من زمان . 2 - حب نفسك كأنك واحد تانى ... يعنى طلع المميزات اللى فى شخصيتك والمواقف الحلوة اللى عملتها وشوف أنت قد إيه كويس وبتعمل حاجات حلوة للناس التانية . 3 - ادعم نفسك ... دعم نفسك وأبدأ معاها صفحة جديدة .. هاتلك هدية من غير مناسبة أو ورد لو بتحبه اعمل حاجة بتحبها (أرقص - ارسم ) العب لعبة مالعبتهاش من زمان كل أكلة حلوة اعزم نفسك عليها سامح نفسك... اعرف إنك إنسان وطبيعى جدا انك تغلط أنت مش ملاك أخرج لوحدك اتفرج على فيلم سينما عجبك بص فى المراية وقول لنفسك كلام إيجابى حيفرق معاك جدا وفى ثقتك فى نفسك خطط لأهدافك ولحياتك خد خطوة تحية هدفك اعمل حاجة خير وخليها سر بينك وبين ربنا 4 - أدى لنفسك كل المشاعر اللى انت محتاجها علشان تجيلك أضعاف ... لو محتاج حب دور على كل الحب اللى جواك وطلعه ليك... ماحدش حيحبك قدك وعلى قد الحب ده حيجيلك حب . لو محتاج اهتمام ... اهتم بنفسك واكتب الحاجات اللى جواك واهتم قوى بوقتك الخاص اللى تريح فى نفسك علشان يجيلك اهتمام قده لو انت أهم واحد عندك مش حتبقى محتاج لحد .. ولنفسك عليك حق ... ودا أهم حق ما ينفعش تنساه . حافظ على حقوقك