نهى فرح تكتب: لقد فعلتها‎

هذ المصطلح المترجم من الإنجليزية إلى العربية نصا بــ (لقد فعلتها) هو أكثر التعبيرات الدارجة تحت راية الانتصار بفعل شىء ما كان من الصعب تحقيقه أو يكاد يكون من المستحيل أيضا تحقيقه، حاجات كتير فى حياتنا كنا فاكرين إنها صعبة لكن مع الإصرار بتنهى عملك فيها وأنت بمنتهى التلقائية بتقول بعلو الصوت لقد فعلتها. هنا الحاجات دى بتكون مهما كانت قيمتها إلا أنها بتكون فى حياتك قمة الإنجاز. مافيش حد فينا ما مرش عليه لحظات انكسار وانهزام وعدم ثقة بالنفس، وبيكتئب فترات وبيبعد وممكن ينسى هدفه وينسى كمان هو وقف لحد فين، وفى لحظة ما بيستعيد كل قوته وبيقف بيدب برجله على أرض صلبة، كان محتاج الوقت اللى فات ده كله علشان الأرض تنشف من تحت رجليه علشان تستحمل سرعة الانطلاقة، وساعتها بيدوس بنزين بكل قوته وهو بيقول لقد فعلتها، ويضيف عليها لقد هرمنا من أجل تلك اللحظة .

الانتصار شىء عظيم الانتصار نجاة من كل شىء مش شبهنا فى الحياة .

إصرارك على الحياة انتصار، معرفتك لذاتك وأنت عايز إيه قمة الانتصار، دخولك تجربة حتى لو لم تنجح بعد انتصار على الخوف، كسر حاجز أى خوف انتصار، الحب اللى فى قلبك للناس انتصار على الضغينة، وقفتك على رجلك وسط صعوبات كتير للحياة قمة الانتصار. لقد فعلتها هو المصطلح اللى كله سلالم اللى بتطلعك للمكان اللى المفروض تبقى فيه وبتوصله بنجاح وعزيمة وإصرار على النجاح، وتصديق نفسك ومعرفة قيمتك الشخصية كل اللى وصلوا للى هما عايزينه أمنوا بنفسهم وبقدراتهم الشخصية وبقيمتهم، وأنهم مش زى أى حد وأنهم مش أشخاص عادين .

فى حياتك حاجات كتير تستحق الكلمه البسيطة دى فى نطقها العميقة قوى فى معناها.