سوزان بدوى تكتب : ست الستات

"تحية إجلال وتقدير لسيدات مصر فى يوم الاحتفاء بعيد المرأة المصرية" ست الستات انتِ ياست يا مصرية شيالة الحمول حمالة الأسية عقلك يزينك قلبك مليان حنية شايلة بيتك باذلة عفيتك ولا عمركيش بخلتى ولا حتى بروحك مداوية جروح حبايبك ناسية تداوى جروحك مانتِ ميزان الحياه و آهٍ آهٍ آه من حنانك الجارف ومن ضلك الوارف ومن سكينتك فى أحلك الظروف اللى تزيل القلق وتدفع الخوف وتطمن قلوب أحبابك اللى فاتحة لهم بابك واللقمة وياكى هنية تكفى ألف مش بس مية إن كانت فتة ولا ملوخية ولا بصارة ولا قلقاس صنعة إيديكى اللى تنباس خيرها مكفى كل الناس و دعواتك اللى بالوما مفتوحة لها أبواب السما يارب بارك يارب خلى يارب تسترها تمللي مع الولاد والبنات وتسامح اللى حى وتغفر للى مات بركة رضاكى تحل كل المشاكل تتحل إن كنتى ابنة ولا أخت ولا زوجة ولا أم خيرك عالجميع بيعم والرزق يجى لاجل خاطرك والمرزق فيه يشاطرك بالدفا والوفا والحكمة والمدادية ست الستات انتِ يا ست يا مصرية