سيد منير عطية يكتب: خَدِك العناد

وبدأتى منّى تخرجى وأنا قلبى واقف يرتجى قلبك عشان يفضل هنا ضحك الحسود على جرحنا وأنتى السبب مين حط ف النار الحطب علشان تزيد؟ مين حط خنجر ف الوريد علشان يسيل دمّى مطر؟ كُنت الأمان .. كُنتى الخطر يا حبيبتى مين خلّى النظر ما يشوفش إلا يادوب بصيص؟ مين خلّى طرح النخل صيص؟ مين حش أوراق الشجر؟ دا ما كانش أبدا فيه خريف ولا كان شتا مين اللى بالهجر ابتدا مين اللى باع ؟ دنا قلبى كان فاتح دراع علشان يضُمك ألف حُضن كان حُبّى طير كان صدرى غُصن أزعل كتير وارجع أحن ف ازاى قدرتى بقسوتك ترميلى قلبى ف بحر حُزن؟ خَدك العناد؟ طب روحى لفّى ف البلاد عمرك ما تلقى دنيا تشبه دنيتى عمرك ما تلقى ضحكة تشبه ضحكتى ولا غنوتى اللى عليها رقصتى يوم عيد الميلاد فاكراها واللا لسه قلبك ف العناد؟ يا حبيبتى لفّى ف البلاد لكن أراهنك لو قدرتى تبعدى دنا فيكى راسم معبدى هتشوفى صورتى ف كل رُكن ف دنيتك وبصوتى رح تتنهدى وأكيد ف يوم رح ترجعى وتخُشى حُضنى بدون كلام وتنامى فيه ...