حمدى نصر يكتب: المصريين مالهمش حل بيضَحّكوا الدموع

تجاوباً مع ما كتبته الدكتورة داليا مجدى عبد الغنى يوم الخميس 1 يونيو الحالى تحت عنوان: أيها الضحك كم تُساوى؟ واعترفت فيه: "أنها تعشق صاحب الروح الخفيفة التى وصفتها بأنها هبة من الرحمن، وأكملت: فما أجمل من أن ترسم ابتسامة على وجه البشر، وأن تُحيل الحزن إلى سعادة، وتُبدل نحيب البكاء بصوت الضحكات". لذلك بالفهلوة كده ومن غير فكاكة يمكننى أن أظن والله أعلم: أنها تعشق الشعب المصرى كله عن بكرة أبيه، لأنه الوحيد فى العالم الذى يملك قدرة إضحاك الدموع !. وفى الوقت نفسه يخاف من دموع الضحك، لذلك إذا ضحك تجده يلحق نفسه قائلا: ضكنا كتير: اللهم اجعله خيرا. وحتى يكون تعليقى صادقاً ومؤكداً أقدم للقراء وللدكتورة داليا هذه الوثيقة المضحكة وهى منقولة مما وصلنى على وسائل التواصل الاجتماعى والعهدة على الراوى: *واحد زرع وردة.. طلعتله أم كلثوم. *مرة واحد راح يوكل محامى. لقاه صايم.. * واحد رمى يمين الطلاق على مراته ماجاش فيها. *كسلان دخل الامتحان وقع منه القلم سلم الورقة. *مرة واحد باع اللى وراه والى قدامه واشترى اللى جنبه. *بقرة جالها جفاف نزلت حليب بودرة .. *ليه الخشب يتيم؟ لأ نه مقطوع من شجرة . * مرة 5 دخلوا كلية الهندسة اثنين طلعوا مهندسين وثلاثة طلعوا مدينة نصر. * واحد بلدياتنا كبر دماغه معرفش يخرجها من التيشيرت . .. *عربية كحيانة صاحبها سابها قدام بيت مهجور.ليه؟؟ ! عاوزها تبقى عربية شبح . * مره واحد عداه العيب اخد اللى بعده. *واحد خلقه ضاق اداه لأخوه الصغير. .. * واحد مشغول اتجوز واحدة مشغولة خلفوا ولد مش فاضلهم . *همبورجر وبيبسى وبطاطس بيجروا فى الشارع تفتكر ليه؟ عشان وجبات سريعة . ... * واحدة بلدياتنا قالت لجوزها قولى كلمه حلوه، قال لها: بسبوسه قالت له يا اخى قولى كلمه تهزنى، قال لها: مرجيحه قالت له قولى كلمه احس فيها انى مراتك قال لها انتى طالق. *مرة دكتور اسنان اشترى عود قصب لقاه مسوس حشاه . .. * واحد جزمته اتقطعت خيطها وبعد أسبوع لقاها كويسه فك الخياطه. *مين أكثر إنسان صابر فى الدنيا؟؟؟ واحد بينتظر إليسا على قناة دينية. * واحدة بتقول لجوزها اطرد السواق كان حيموتنى مرتين فى حادثة قال لها معلش ياحبيبتى دا غلبان ومسكين ووراه كوم عيال: خلينا نديه فرصة ثالثة . *ولد قال لأبوه: رخصة السواقة خلصت يا بابا قاله:من لفك فى الشوارع طول النهار. * وكيل النيابة سأل واحد صاحبنا: انت دوست الراجل بعربيتك ليه؟ قاله: طلبت رقم تليفون ردت عليه واحدة قالت: إذا كنت عايز تربح خمس مكالمات مجانية دوس واحد!!. هذا ما توفر لدى من المسموح بنشره واللى كانت بعض النكت بالنسبة له قديمة ليسامحنى ورمضان كريم وإلى وثيقة اخرى بإذن الله.