السيد عبد الكريم أحمد يكتب: بائع سريح

أنا بأصحى الصبح ولما بأصحى الصبح بيكون الصبح صبح ويدوب الشمس بدأت تفتح جاهز إنى أسترزق وأتربح وفى دروب المحروسة بأسرح عارف دورى ما الدنيا إلا مسرح وبثوب العفاف متلفح أتحرى الحلال ربما أفلح وزملاء الدرب به أنصح أيام تحت الشمس اللى تلفح والبرد اللى يقدح وأنا بصيحاتى أصدح من أدواتى الصوت العالى اللى فى بضاعتى يمدح قابلنا كتير من معنا يمزح ومن يحب علينا يتنصح بسايس الكل علشان أربح المهم عملت كام وإنت مروح ولو عاندت مع دا وزعلت دا الخسارة حتكون أفدح ما هو كل إناء بما فيه ينزح ما تنساش إنى متعلم أخدت دبلوم علشان أكون جدير ببنت شرفنطح مش كلامى فيه فكرة وملمح ما هى الحياة علمتنا كتير المهم إزاى أروضها وأنجح