نيرة الإمام تكتب: العروس الأرملة

بعدك الخوف مبينتهيش بتمنى لو معاك فى قبرك أعيش بحبك حب واصل للعبادة اختفت من حياتى بعدك السعادة أنت اللى روحى فداه وأنت اللى أتمنى لو للحظة ألقاه يا اللى انتهت بعده بالنسبة لى الحياة أنت الحب الوحيد بحياتى ومستحيل هنساه أنت راجلى أنت سندى أنت ليا بعد ربى أنت روحى داويت جروحى أنت ملكى على عرشى يا اللى سكنت الروح مبقاش ليا بعدك غير الجروح اللى مش عارفة بعدك أداويها تعالى زى زمان طبطب عليها وحشتنى أوى حنيتك نظرة عنيك وبسمتك ملحقتش أشاركك فى دنيتك وبتمنى أشاركك فى أخرتك ست سنين مستنية اللحظة اللى هتجمعنى بيك أنا بيك أنا ليك يا اللى مشيت وروحى فيك عشت معاك 11 شهر كانوا بالنسبة لى كل الدهر صحيح أنا العروس الأرملة بس يكفينى لحظة فى حضنك يا حتة سكرة عيد جوازنا الشهر ده يا حبيبى فى الأربعين بتاعك يا رب راح طبيبى صبرنى شاعلة نارى محدش غيره يطفى لهيبى آه يا نارى آه يا عذابى خسرت دنيتى فقدت كل أحبابى آه يا مرارى ويا عذاب سنينى أعمل إيه فى اشتياقى وحنينى يا رب صبرنى على فراقه قدرنى وهو عايش كنت أحلم بيه وأصحى ألاقيه جنبى دلوقتى مش كل يوم هلاقيه يا رب إرحم حبى كل حاجة فيا بتصرخ بأعلى صوت بعده مكتوم صوتى آخر حاجة طرقت على بالى الموت يا رب إرحم سكوتى الكلاب اللى كانوا قالبين فيران فى وجوده دلوقتى بقت بتنحر بأعلى صوتها بعد موته نسيوا إنى سلاحى حسبى الله ونعم الوكيل بشق طريقى بيه وده اللى حبه حبيبى فيا اتكالى على الله ربه اللى بيطمن بيه اطمن يا حبيبى ومتخفش عليا أنا معايا ربنا مش وحدانية اللى جمعنا طمنك عليا بيك فى الدنيا وعيشك جوايا وهو القادر يطمنك عليا فى الآخرة بوجوده معايا قادر يجمع أرواحنا وينزل علينا رحماته هو أرحم بينا من نفسنا ورحيم بكل عباده