إحنا شعب دمه خفيف، لهلوبة سريع التصرف وذكى (حتى بقت عبارة بيفهمها وهى طايرة) من مقولاته المأثورة.. شعب شاطر فى الفهلوة اللى بقى اسمها الحركى واحد من ثلاثة: "شغّل دماغك". أو "خلّص نفسك" أو: "كبّر الجمجمة" وكله ماشى حسب السوق.
- ادعاء الفهلوة زمان كان: "احنا اللى دهنا الهوا دوكو". "احنا اللى خَرَمنا التعريفة"!.
الكلام ده دلوقتى (Expired ) وبقى موضة منتهية ومؤشر لتخلف كبار السن "الدقة القديمة" مع تفشى عدوى الروشنة اللى فيها الرطن بالإنجليزى بيكتسح اللغة العربية ميه بالميه.
ومع انتشار فيروس الروشنة الفتاك أتوقع ظهور "اكواد" فهلوة جديدة تواكب حركة التطور المُخيخى للشباب على غرار:
- "احنا العيال الروشة المخلصة اللى لوّنا قوس قزح بألوان ميّه ومن سنين ما اثر فيها مطر و فضلت ثابته زى ماهيّه"
- "احنا العيال الروشة اللى بنينا للفهلوة فوق السحاب غيّه"
- "احنا اللى بالفهلوة وبخفة اليد بنعمل بالميّه عُقْدة وخيّه "
- "احنا اللى غسلنا همومنا فى ميّه النيل و فضلت حلوه ونقيّه
- "احنا اللى لوّنا بحر بلون أبيض وبحر بلون أحمر وبالفهلوة ميّه القناة اللى بينهم مابقتش بمبى و فضلت بألوانها الطبيعية".
- احنا اللى قتلنا البحر الميت وفلْسعنا من غيرما ندفع الديه
- بحر الظلمات نورناه بلمبة ليد والفاتورة لبسناها لوزارة الماليه
- "احنا اللى فتحنا للفتاوى كشك على كل ناصية فيسبوكيه"
- "احنا اللى مابنعرفش ابدا كلمة مااعرفش ولو فتوى دينيه"
- "احنا اللى على ايامنا ومنا وفينا شوارعنا مليانه عربيات اشكال وألوان من غير لوحات رقمية".
- "احنا اللى بنمشى فى المخالف ولما نتفاجأ بواحد ماشى صح بنقوله العتب مش عليك العتب على وزارة الداخلية"
- "احنا اللى لما نحب ننتحر بنركب مواصلة عموميه
- احنا اللى اخترعنا عربيات من غير شراع بتمشى فى بحور المصارف الصحية.
- الصرف الصحى كان مشكلة زمان ودلوقتى بنلاقيه كل مانفتح الحنفية
- " من حبنا للنضافه بنزقل الزبالة اول باول من الشباك وبنشتكى فى انفراد على المجالس المحلية".
- "احنا اللى بنعيش ونموت فى اليوم الواحد بدل المرة ميه
- انا مت من العياط، وهى ماتت من الخوف وهو مات من الضحك على نكته قديمة من عشمه فى ضحكة حقيقية.
- واحنا اللى بنموّت نفسنا لما نكون نفسنا فى حاجة وتطلع عينينا عليها لان تمنها نص الماهيه.
- حتى الحب بنموّت نفسنا فيه وبنقول: بموت فيها بنت الايه على قلبى زى العسل وهى أغلا عندى من الدنيا ديه.
- وبنموت فى الاونطه وبنعتبرها شطارة وخفة دم ازليه
- اهالينا زمان كانوا بياكلوا الزلط أما احنا بنزْوَر من الزبادى المغشوشة بالميه
- أهالينا كانوا بيفتحوا غطا قزايز الببسى بسنانهم واحنا سنانا بتقوم علينا لمّا نمضغ الميه!!
- الناس معذورين من الحر بيفتحوا شبابيك بحريه
- وبنطلوناتكوا كلها شبابيك بيتكسف منها اولاد الشوارع الخلفيه
- ايوه بنطلوناتنا تحت اللحم وفيها شبابيك وبلكونه قبليه
- احنا مش حنعيش ايامكو مايلزمناش بُلْغه بَنْص وجلابيه
- مش عارف ياشباب انتوا اللى ايامكوا صعبه والا احنا اللى آخرتنا سودة ورديه .
- عيشوا حياتكوا وخدوا زمانكوا لكن خفوا الروشنة شوية
- علشان ولادنا وولادكوا يترحموا علينا ويقولوا سابلونا مصر بخير شابه وعفيه.