عبد العزيز المنسوب يكتب: الغربة مش فسحة

كل اللى عاش أهو شاف الغربه مش فسحه الغربه فرقة وطن مش لِعْب أو مُزْحَه الغربه همّ وغمّ مع ضغط مع قُرْحه فلوس بتيجى ترُوح ولا عمره شاف فَرْحه ***** تجرى السنين وتْفُرّ عُمْرُهْ هناك بِيْمُرّْ محروم من الأحباب عِيشْة الغريب ما تْسُرّْ محبوس وكلمة آه تِطْلَعْ بطعم المُرّْ حقّ الغريب بِيْضِيع كاتم فى قلبه السرّ ******* وأصعب ما فى الغربه إنّك تودع أبوك أو تِتْحِرِمْ م الأمّ أو م الولد وأخوك وبعيد عن الزوجه جالس مع الفيس بوك وسكاى مع الواتساب أهلك بسرعه خدوك ******* ساكن فى غرفه يدوب فيها الخطا مترين أدوار على أدوار ساكن معاك عشرين محسود من اللى هناك عَادِدْ عليك ملايين لو ينكشفْ لُه الغيب يبكى بدمع العين ******* واللى معاه الأهل تلقاه فى صورة كهل إقامات ورا طلبات ظهره اتحنى من التُّقلْ مهموم من البيانات وافد فزيدوا الحِمْل فالغربه مش فسحه يا اهل الحرم والحِلّ ******* الغربه هات مع هات شيّال لحدّ ما مات عطف الأبوّه اتْمحى من كثرة الغيابات والزوجة مترمّله إلا شهور و ساعات يبنى الشقق والفلل ويسيبها كالخرابات ****** الغربه همّ وأسى تركب شفر أو حوت رحله سفر بتفوت آخرتها موت وسكوت