منى حسن تكتب : مصر جميلة

على فكرة لسه مصممة أن إحنا حالنا وبلدنا احسن من حال ناس كتيرة أوى، بلدنا حلوة وجميلة أوى أوى وكل مادا ما باقتنع باللى أنا بأقوله .. واحتكاكى بره واحتكاكى بالناس بيثبت لى أن اللى بأقوله هو ده صح .. إحنا عاوزين ثقافة وعايزين إمكانيات وعايزين توجيهات بناءة إيجابية .. وأهم من ده كله إحنا عايزين التزام.. وأكيد معاه نظافة وأمانه .. أمانه فى الأداء وأمانه فى العطاء وامانه فى كل حاجة .. النظافة والالتزام من مفاتيح نهوضنا للإيجابية فى بلدنا ..النظام مهم جدا .. لو عملنا كده يبقى أكتملت حاجات كتير اوى فينا وفى المنظومة بتاعتنا, وهى اضافات اصلها موجود بس هو عدم مبالاه واستسهال وايوه عندنا مشاكل كتيرة أوى أوى ولو اتحلت بالطرق دى ولو على مراحل حتبقى احسن بلد فى الدنيا. اقتناعى بيزيد فى كل مره بأخرج فيها بره بلدنا .. ناسنا ما تتعوضش .. طريقتنا ما تتعوضش .. اهل بلدنا فيهم حاجة مش موجودة فى الدنيا كلها .. بس وماعندهمش حاجات موجوده فى الدنيا كلها .. اللى مابفهموش انهم بيتعاملوا بيها عادى برة بلدنا لأنهم مجبورين جايز وده شئ مش كويس لإن البنى آدم لازم يعمل ده لوحده من غير إجبار ويكتسبه ويتعلموه إذا كان معندوش أو ما يعرفوش.. ما يقلدش لازم يتعلم علشان التقليد ما بيكونش بصدق إنما التعليم بيبين إيه هو الصح من الغلط ومشكلتنا أن إحنا بقينا بنقلد بس من غير ما نفهم .. من غير ما نفهم تاريخ التقليد ده لإيه أو كان سببه ايه أو كان بيوصل لإيه أو كان يهدف لإيه .. إحنا حياتنا اتشقلبت كلها من الشمال لليمين بسبب أن هى فيها تقليد جامد جداً وكان تيار مسبب لتغيير عاداتنا وتقاليدنا وتغيير فكر الشباب.. ومش بس الشباب لإن دخلت تيارات تانية كتير أوى وبقالها سنين وسنين وسنين بتتوغل جوانا بشويش خالص.. مكنش فيه ادراك ووعى أن ده بيحصل علشان خاطر يغيرنا ويغير أصولنا وجدور عاداتنا وتقاليدنا وأصل كلامنا.. فاللاسف الدنيا مش ماشية بالطريقة اللى الواحد يتخيل أن هى المفروض تكون. الواضح دلوقتى أن الناس كلها عاوزة تتغير بس لازم يبقى فيه علامة للتغيير يبتدوا منها .. لازم يبقى فيه نقطة يبتدوا منها لإن غير كده مش حيقدروا يعملوا أى نوع من الإيجابية فى التغيير .. إحنا إتغيرنا فى أقل من 15 سنة .. هل إحنا محتاجين 15 وإلا 25 سنه علشان نرجع كويسين تانى , علشان نرجع بالايجابيات اللى فيها الأمانه والالتزام والنظام والصح والغلط والمفاهيم الايجابية اللى المفروض تكون فى مجتمع زى مجتمعنا.. إحنا المفروض ما نصنفش تالت, لأن التالت ده انا شايفة أن فيه بره مصر: هما تـالت ورابع حتى فى أقوى بلاد العالم اللى بيقولوا عليها من البلاد اللى ماسكة مفاتيح العالم ... أنا ساعات بابقى فى مكان وأقول عمار يامصر.... وفى نفس الوقت والمكان بأقول ياريت وليه مانكونش زيهم هنا ... بس لما اشوف الالتزام بقول ليه و بأتمنى ... بأتمنى نضافة و بأتمنى التزام وبأتمنى نظام وبأتمنى صدق وأمانه.. بس أنا أتمنى شعبى يبقى كده .. أتمنى أنا منهم أبقى كده .. أتمنى إنا حياتى وبيتى وأهلى يكونوا عايشين فى وسط بيئة صحيه وولادهم يطلعوا كده بس بمصريتهم .. مصر جميلة أوى أوى أوي. من زمـان زمـان بأقول .. دمرنا بلدنا بإيدينا وبالأفكار اللى جت ملت دماغنا وهى السبب فى تغيير مسار حياتنا سواء من سياحة واقتصاد وأفكار ومعتقدات وحاجات كتيرة اوى .. البساطة احلى حاجة فى الدنيا عقدنا نفسنا بنفسنا .. عقدنا حياتنا بالمنظره والمظاهر وسبنا أصول الحياة ..عقدنا نفسنا بالماديات ونسينا الانسانية وإزاى نتعامل مع بعض بقى هدفنا وحده إزاى نقدر نكسب من بعض .. سبنا حياتنا هى اللى تمشينا وفى نفسنا مفكرناش فى بكره حيكون فيه ايه فى حياتنا .. الإتكالية بقت هى سمتنا.. والطلبات بقت هى هدفنا وعاوزين من غير ما نحط مقابل لا بشغل ولا إنتاج ولا التزام ولا أى حاجة من الحاجات اللى مفروض تدى طاقة ايجابية لأى حاجة لا لنفسنا ولا لمجتمعنا .. لو ابتدينا شوية شوية بتغيير سلوكياتنا ونبتدى نبص على قد إمكانياتنا حنقدر نعمل ايه بطريقة ايجابية أعتقد أن حتكون دى اول بداية اننا نقدر نعدل من اسلوب حياتنا وبلدنا .. الموضوع مش محتاج حاجات كتير .. الموضوع أبسط من البساطة, الضمير و نفكر واحنا قدرتنا للاستيعاب سريعه.. الالتزام بالنظام .. ما أعتقدش أن البنى آدمين لازم تبقى الهمجية هى اسلوب حياتها لازم يتعلموا شويه شويه إزاى يخلوا الدنيا أبسط من كده ومنظمه وداخلها احترام .. المواضيع اسهل بكتير من أن إحنا نعقدها .. كل واحد عارف جوه نفسه ممكن يعمل ايه .. إنما هو ما بيعملش بيه علشان هو مستعجل وبيستسهل طريقة حياته ياريت نركز على التربية تانى والاحترام .. المستوى الاجتماعى ما بقاش فارق مين معاه فلوس ومين ما معهوش فلوس لإن بقى الفكر واحد فى كل الطبقات .. حتى الطبقات كلها اندمجت جوه بعض ما بقاش فيها تفرقة ولا قد حد عارف هو مين ولا هو بتاع ايه ولا حياته ايه للأسف الشديد كان مهم أوى كل واحد يعرف هو واقف فين فى مستواه, لأن ده من ضمن الالتزام بالطبقات هو برضه نوع من انواع النظام الاجتماعى، مش انه هو الطبقية بإن البنى آدمين يقللوا من شأن بعض ولكن لهم أدوار.. كل واحد له دور والإلتزام بالدور بتاعه بس .. مهم أوى أوى كل واحد يعرف حدوده ايه علشان يقدر يدى فى نطاق حدوده وينتج .. إنما اللى فاكر نفسه ده بتاع كله .. وانه بقى بتاع كله ده : الناتج بتاعه بيقل والعطاء بتاعه بيقل واسلوب حياته بتبقى زائفة مش هو .. وبالتالى بيأثر على سلوكياته وانتاجه بالسلبية للمجتمع .. الثقافة مهمة جدا جدا جدا لأن الثقافة دى توجيه أصلا .. أنا مش بأتكلم عن الثقافة على التعليم والمدرسة لأن ده حاجة تانية خالص أنا بأتكلم ثقافة يعنى معلومات البنى آدم لازم يبقى عنده معلومات .. يبقى فاهم هو بيعمل إيه ليه وفاهم دى علشان ايه وفاهم هو تاريخ حاجته ايه و تاريخ اللى بيقلده ده ايه وكل معلومة بيسمعها يستفسر منها ما يرددهاش من غير ما يعرف اصولها لأن كل ده سلبيات بتيدى تأثيرات سلبية على المجتمع .. إحنا حياتنا فيها حاجات كويسة كتير ولكن أصلاَ, اللى حصل فيها ده بقت حياتنا صعبة اوي.. مش عايزة أقول وحشه .. بس أنا لسه بأقول حتى حتى حتى باللى بيحصل فيها أنا بحبها .. بس نفسى تبقى أحسن من كده ونفسى ياخدوا بالهم من بعض, نفسى يفكروا شويه نفسى يحبوا بلدهم علشان يقدروا يعملوا حاجة . .. حبوا بلدكوا اوى ما تعرفوش قيمتها بجد .. مصر جميلة ..صدقونى كفايه الروح والضحكه من القلب أنا بحب مصر