سيد منير عطية يكتب : مالكش حيلة

مش غريبة لمّا عقلك يبقى شايف نفسه بس مش غريبة لمّا قلبك عمره بالعالم ما حس مش غريبة تبقى أعمى حتى وأنت ف عز شمس م أنت طول عمرك أنانى نرجسى والطبع غالب رغم إنّك جوّه منّك ما تساويش نُص القوالب ياللى أمكر م التعالب مش ح تصبح حاجة خالص طول ما فى دماغك وساوس طول ما معجون بالجحود ياللى من حبّة تراب وف نهايتك أكل دود طول م قُدّامك سدود رح تكون أراجوز لروحك أو تكون بلياتشو حاوى مش ح تسمع م الغناوى إلا صوت معجون نشاز طول ما روحك شايفه روحك ألماظات وانت الإزاز والكلام لو كان مجاز رح نقول معدن صفيح والا ريشة ما تسوى حاجة طايرة حايرة ف وسط ريح لو ف قلبك شىء صريح بُص ثانية ف المراية شوف ملامحك شوف طبيعتك خُش لحظة جوّه نفسك مش ح تلقى إلا ضلمة لو ف عقلك ربع حكمة رح تعيد ترتيب طبيعتك رح تدارى بسرعة خيبتك أو ح تعرف حجم نفسك قد إيه نفسك قليلة قد إيه وسط الخلايق إنت شىء ومالكش حيلة غيّر النفس البخيلة ربما بعد المحاولة تبقى حاجة وليها معنى