انا هتكلم النهاردة عن وجهة نظرى الشخصية ولا أمثل أى حد ولا بنتقد ولا بتفق مع أى حد أنا بمثل نفسى وافكارى ومجموعة قليلة من الناس المحيطة بيا وبس ..
خلينىى أحكيلكم حكاية أحسن أنا أصلا بحب الحواديت ..
كان يامكان فى نفس العصر اللى احنا فيه ده بالذات .. من كام سنة كده مش من كتير اوى يعنى كنت اعرف اتنين حبوا بعض جدا وارتبطوا واتعلقوا ببعض وكانوا مع بعض ليل نهار الكلام ده كنا فى سنة اولى كلية يعنى سورى شوية عيال بعد كام كلمة حلوين وكام موقف احلى قرروا انهم يتخطبوا اه ده حقيقى والله كنا الحمد لله كبرنا سنة وبقينا فى سنة تانية .. القرار اللى كان يخض بجد انهم قرروا يتجوزوا البنت عرضت الفكرة على اهلها لكن باباها عارض وبشدة لانهم لسه عيال !!
الاب قرر يفهم البنت وبمنتهى الهدوء والعقل " يابنتى انتى بكرة هتتغيرى انتى بنوتة ذكية عندك احلام كتير بعد ماتتخرجى وتشتغلى هتلاقى دماغك بتتغير وافكارك بتتغير حتى قلبك هيتغير انا مقولتش انه وحش بس اللى انتى شايفاه مناسب دلوقتى ممكن ميبقاش مناسب ليكى بعدين " .
زعلوا وغضبوا واتعصبوا وفى الاخر خضعوا وسمعوا كلام اهل البنت وعدت الايام والسنين جربوا كل حاجة راحوا كل مكان كبروا مع بعض يوم عن يوم كانوا بيكتشفوا الدنيا وبيكتشفوا بعض !!
اتخرجوا ومع اول نجاح للبنت بانت حقيقة الولد فى شوية غيرة منها ليه تشتغل قبلى وفى نفس مجالنا وانا مسحول فى تخليص ورق التجنيد وحوارات بس حبهم كان اقوى وفضل مكمل برغم انه قل حبة اتخطبوا والبنت نجحت تانى والولد حقيقته بانت اكتر ازاى هى بتعمل كل اللى هى عايزاه وانا واقف مكانى حتى الشغل اشتغلته واسطة لحد ما حصل الصدام ونبوءة الاب اتحققت والبنت اكتشفت انه كان على مقاسها زمان بقا اصغر كتير من مقاسها دلوقتى ..
علميا البنت والولد لما بيكونوا فى سن واحد البنت بتكون دماغها اكبر من الولد ده مش كلام وخلاص ده واقع وعن تجربة ودراسة وده اللى حصل بالظبط مع صحابنا فجأة لاقت نفسها سابقاه بكتير لدرجة انها بقت مبتعرفش تتكلم معاه ولا حتى تشاركه نجاحها بقت بتعرفه من باب الواجب واتقلبت الموازين وفى يوم وهما بيتكلموا وبيجهزوا لبكرة سرحت اتخيلت بكرة معاه وجانبه لاقت نفسها ملانة شافته اصلع وعنده كرش من كتر القعدة على القهوة حست انها عايزة تهرب شافته واحد اقصى طموحاته انه ياكل وينام حست انها مخنوقة وشافت نفسها بتفشل فى حدوتها وهى لسه فى اولها !!
انا شوفت القصة دى بتكرر كتير بس مع الاسف فى ناس بتكمل عشان بتخاف .. بتخاف تبدا من الاول .. بتخاف متلاقيش اللى يفهمها اللى يحبها .. بتخاف انها ترجع لوحدها لاعتقادها انها هتبقى لوحدها والخوف ده كان سبب فى ارتفاع نسب الطلاق وحالات التوحد بين الاطفال وامراض نفسية كتير هتطلعنا جيل مشوه نفسيا والسبب الجواز المبكر بدون وعى ..
من وجهة نظرى الضئيلة اننا قبل ما نتجوز لازم نوصل ولو لجزء صغير من احلامنا نشتغل ونسافر ننجح ونفشل نجرب ونتخلى عن فكرة الفارس اللى بحصان ابيض وسندريلا اللى زى القمر .
لما نقرر ناخد خطوة الجواز طبعا لازم نكون بنحب جدا أنا مؤمنة جدا بده بس لازم برضو نفهم أن الحب ده رقم على قائمة كبيرة لازم تبقى موجودة فينا احنا الاتنين عشان جوازنا يكمل وننجح ونطلع للدنيا جيل سليم نفسيا ونعيش واحنا راضين على الاقل عن اختيارنا ومنندمش .
وانت بتاخد قرار الجواز لازم يكون قلبك وعقلك متفقين على الشخص ده غمض عينك وشوف نفسك كمان كام سنة هاتبقى عايش معاه ازاى الناس بتبان ياجماعة مع المواقف الاسلوب والتعامل اعرفوا عيوب بعض قبل مميزاتكم حبوا بعض جدا واتجننوا بس اعرفوا انه هايجى يوم والجنان ده يهدى مع زحمة المسئوليات ومش هاتفضلنا غير الايد اللى تشدك وقت ماتقع وتساعدك تقوم واحسن من الاول كمان
غمضوا عينكم واتخيلها/ اتخيليه وهو / وهى متعصبة مين فيكم هيعدى ومين هيعند ويتعارك اكتر
غمضوا عينكم واتخيلوا نفسكم وانتوا سهرانين عشان عندك / عنده مشروع مهم فى الشغل ولازم يتسلم هاتسيبك / هايسيبك لوحدك وينام
غمضوا عينكم واتخيلوا بعض وقت التعب ياترى هتاخدوا اجازة من الحياة عشان تفضل / تفضلى جانبه بتديلوه الدوا وتاكيله
غمضوا عينكم واتخيلها وقت اكتئابها هتجبلها شيكولاتة وتقعد تضحك فيها وتسيب الدنيا عشان تفضل جانبها وهىى بتعيط من غير سبب !!
غمضوا عينكم واتخيلوا فى وسط ماهو راجع تعبان اخر اليوم من شغله هتحضريله اكلة بيحبها وتقعدى تسمعى كلام يصدع عن الشغل وبس وغالبا مش فاهمة ربعه
هاتسيبوا لبعض المساحة أن كل واحد فيكم ينزل مع صحابه عشان يفك شويا هتشاركوا بعض اهتماماتكم ياترى هتعرفوا تشدوا بعض للنجاح وتفخروا ببعض
فكروا كويس ياجماعة وبلاش جواز بدون وعى بلاش جواز قايم على حب عيال بلاش حسابات مالهاش غير نهاية واحدة بلاش فشل النجاح طعمه حلو ..
نصحيتى ليكى الحياة مش راجل متضيعيش سنين عمرك وترجعى تقولى انا فين بعد فوات الاوان دورى على نفسك واعرفى الدنيا اعتمدى على نفسك خليكى قوية وبعدين دورى على اللى شبهك اللى يكمل حتة البازل اللى ناقصة فيكى مش يمحيكى ويعملك نسخة من انسان إلى وشوية ويزهق منها ..
نصحيتى ليك الجواز مش هو الانجاز اللى لما تحققه هاتبقى عملت اللى ميتعملش الناس كلها بتتجوز على فكرة الجواز حاجة مكملة لحياتك دور على اللى تبقى ضهر تتسند عليه لما الدنيا تيجى عليك الجواز مش بنت زى القمر عشان انا اسفة انى اقولك أن الواقع يختلف كتير عن التلفزيون ياعزيزى !!
اتجوز اللى تحرك عقلك قبل قلبك اتجوز اللى روحها حلوة بتحب تضحك عشان هى دى اللى الحياة هاتبقى بجد معاها حياة ..
اختاروا اللى عيالكم يفتخروا بيه خلى بنتك تبقى نفسها تطلع شبه مامتها خلى ابنك يبقى حلمه انه يبقى زى باباه اختاروا صح عشان ده الاختيار الوحيد اللى الغلطة فيه بعمر تعيس ..