راندا جاد تكتب: طشة ملوخية وشهقة

طشة ملوخية وشهقة كمان، وحياتك تتقلب يا مان، اللى واقف يقعد واللى قاعد يقف واللى برة يدخل جوة واللى جوة يدخل جوة كمان. طشة ملوخية وشهقة بريحة، تنخشش جوة المناخير، تخلى البطن تصوصو، والدماغ تتعمر، والخدود تحمر والعيون تبرق. طشة ملوخية وشهقة تمام، تخلى الكل يقف تعظيم سلام، للحاجة اللى داخلة فرحانة بتضحك وشايلة الحلة ومش عايزة إلا كلمة تمام، والكل يقعد مكانه مستنى نصيبة بالتمام، وبانسجام وفرحة هتتك بتتك تخلص الحلة وتتلحس، وتفضل الملوخية طعمها على اللسان لآخر العمر يتحس. طشة ملوخية وشهقة، كل واحد عنده ملوخية مامته أحلى، كنتى بطشيها بالحب ولا بتشهقى بأسماينا يا حاجة ؟! طشة ملوخية وشهقة، كان فيه عيلة ولمة، كان فيه خال وخالة وعمة، والجد والجدة على راسهم ريشة وعمة. طشة ملوخية وشهقة، لميتى الجيران علينا يا حاجة، طالعة بحلة ونازلة بصينية، إشى بتيفور وإشى كيك وإشى مهلبية. طشة ملوخية وشهقة بدور عليكى مش لاقياكى ياحاجة . غبتى وقولتى عدولى ، ادينى بعد والأيام ما يتخلص، رحتى واخدتى العيلة واللمة، وطعم الأيام الحلوة. رحتى وراحت معاكى الضحكة الصافية، بقيت ضحكة صفرا وباهتة. مقدرش أقولك ارجعى لأنى عارفة إنك مش راجعة، كفاية على عايشة بدعواتك ليه، بدعيلك فى كل صلاة تكونى فى الجنة متهنية.