كل شىء فى الدنيا مربوط بكلمة
وكل كلمة تقولها ممكن تجرح أو تداوى
دعوة الخير بالكلمة الحلوة حكمة
لا تتباع ولا تشترى بس كتير تساوي
الكلمة الحلوة هى مفتاح القلوب
تعيش فى وسط الناس محبوب
تدخل النفس من غير استئذان
وجوا القلب يبقى ليك مكان
ترسم ابتسامة على وشوش البشر
يدوب القلب ولو كان حجر
تكسر كل حاجز وسد
وجسور الحب تتمدد
الكلمة الحلوة هى بلسم شافى
فى عز البرد حضن دافى
لون أبيض زى اللبن الصافى
بها يتحول الكره لحب ومودة
هى السند فى وقت الشدة
زى الشجرة الطيبة أصلها ثابت
وفرعها فى السماء زرع نابت
تزيل غبار الهم فى وقت البلاء
هى الراحة بعد العناء ينطق بها العقلاء
وبكلمة بسيطة مش حويطة
تفتح للخير ابواب وكل باب له ثواب
هى أزهار الربيع فى فصول الألم
ترسم ألوان الأمل ولو من العدم
تزرع بذور المحبة تطيب بها النفس
تنقذ عيون غرقت فى دموع اليأس
وتأخذها تعدى بيها لنور الشمس
هى بسمة الحياة وعطر الشفاه
لها عطر فواح تسحر الأرواح
حروف مضيئة فى وقت الضيقة
بيها يهدى الغضب
زى ما تطفى الميه اللهب
هى مش محتاجة ترجمة
بنظرة عين مشاعر مترجمة