أشاد الإعلامى عمرو أديب، بتعديلات البرلمان على بعض مواد قانون الزراعة بشأن زراعة الأرز، موضحاً أنه يتفهم تخوفات الأعضاء، مستطرداً: "ازرعوا أى حاجة تانى، الفترة اللى جاية نستورد الأرز والبرسيم من برة، والزراعات المستهلكة للمياه يجب أن تتوقف تماماً".
وأضاف أديب، خلال تقديمه برنامج "كل يوم"، على فضائية "ON E": "قناة الجزيرة مولعة فى فلاحين مصر، هو مش عاوزك تلم ميتك، هو عاوزك تبقى عطشان، هو ساب الدنيا كلها، وقالك الحق يا فلاح، ما قامت به الدولة اليوم صح، وأقول للفلاحين الرزق مش بس فى الأرز ومش بس فى البرسيم والقصب، الرزق موجود فى كل الزراعة".
وتابع أديب: "لما بتعمل حاجة صح هو بيتجنن، هو عايز يضغط عليك ويبقى عندك مشكلة فى المية، هو عاوزك محتاج، بس دا عمره ما يحصل لمصر، المية بتاعتنا كلنا، لأن المية اللى انت بتضيعها دى ميتى أنا، أى حاجة تانية مش مشكلة، ولو ضيعت فلوس ولا يفرق معايا، ولكن لو خدت كوباية مية من نهر النيل، دا حقى، المية بتاعتنا كلنا".
وردت قناة الجزيرة على هجوم أديب عليهم بسبب انتقادهم للقانون بعرض تصريحاته، وعلّق أديب ساخراً: "حطونى أهم على الشاشة، صباح الفل، بحيى كل أهلنا فى الجزيرة، المعركة بقت واضحة، مش كده ولا ايه يا اخوانا، أنا قلتلك فانت رديت، احنا فاهمين انتو عاوزين تعملوا فى البلد إيه، وقاعدينلى وأنا قاعدلهم، مش هنسيبها كده، ومش هنسيب الميه يبقى فيها مشكلة، وهناخد بالنا كلنا يا جماعة".
واستطرد أديب: "عاوز المذيع هناك يقولى أنا عاوز خير مصر، يا أخى دا انت أهلك هنا، هتلقى خالك وخالتك، عاوزهم مايلاقوش كوباية مية يشربوها، عمرها ما تحصل فى مصر إن شاء الله، البلد دى فيها بركة، وربنا بيحميها، وجالنا الأسوأ من كده بكتير وبرضو معملش معانا حاجة، أنا بقيت شاشتين على قناة الجزيرة، وواخدينى على الهوا، كتر خيرهم والله بيوصلوا صوتنا".
