"علاقة المنتخب بإله الخصوبة" عنوان الحلقة 70 من برنامج جايلك فى الكلام

خصص برنامج "جايلك فى الكلام" حلقته الـ70 للحديث عن قدرة مجتمعنا فى استغلال الأحداث العالمية للترويج لثقافتنا وحضارتنا، خاصة فى الأحداث الرياضية مثل كأس العالم الأخير بروسيا. وبدأت الإعلامية إسعاد يونس الحلقة بمقدمة تشويقية جاء فيها حوار متبادل بينها وبين أحد الباعة بمحلات متخصصة فى الأدوات الرياضية، جاء نصه كالتالى: "دخلت محل أدوات رياضية الشهر اللى فات وبمنتهى الثقة اللى فى الدنيا سألته: عندك سوبيك لو سمحت؟ الراجل إصفر فى نفسه كده، وسألنى: مين يافندم؟ _سوبيك سوبيك !! _ الراجل ابتسم ابتسامة بهتانة كده وقاللى لأ بيقفل الساعة 6 والله !! _ مين ده ؟؟ _ السباك اللى جنبنا. _ هنا والحديث كان هياخد منحنى مالوش لازمة قوم أثرت مبدأ السلامة ومشيت بالذوق أحسن! _ شوف الراجل اللى مايعرفش سوبيك !! غريبة بالذمة ولا لأ.. حد مايعرفش سوبيك !؟ انتوا ساكتين كده ليه؟ ماتعرفوش سوبيك ولا إيه ؟!! لا والنبى ماتعرفهوش انتوا كمان !!؟ لا استنوا بأه جايالكوا فى الكلام. _سوبيك يا حبايبى، ده يبقى واحد من آلهة مصر القديمة، وكان يأخذ أشكالا عديدة، كلها تتمحور حوالين التمساح. فتلقاه مرة بهيئة تمساح مكتمل، أو راس تمساح فقط، أو جسم راجل برأس تمساح. _اعتبره المصريون القدماء إلها للخصوبة والنماء والقوة، وكان من الآلهة المتغيرة واللى ليهم طبيعة خاصة . _ سوبيك مؤخرا تم استخدامه كتميمة لفريقنا فى المونديال، ورغم أنها مش أول مرة الإله سوبيك يكون تميمة فى حدث ما، إلا أن دى أول مرة يتم استخدامه من المصريين نفسهم ! _ قوم أنا بسلامة نية قلت يالا بقه يابت انزلى اشترى وبضعى حبة سيفونيرز كده للمونديال اللي شاركنا فيه بعد شوقة. يذكر أن البرنامج تقدمه الإعلامية إسعاد يونس على "نغم اف إم" بالتعاون مع مصر الخير.