قال أشرف أبو اليسر، الطيار المفصول بسبب أزمة محمد رمضان، إنه لم يطلب أموالً من الفنان، قائلاً: "لو فيه أي حد من الإخوة اللى كانوا معايا وساندونى، قال إنى طلبت مليم من حد يبقالى الكلام"، متابعا: "أنا مطلبتش مليم من حد، لأنى تاريخى ووضعى اللى كان هينتهى بعد 3 سنوات ونص بتكريمي، النهاردة انتهى بفصلى عن الشغل وإيقافي عن الطيران".
وأضاف خلال مداخلة هاتفية لبرنامج "90 دقيقة"، على فضائية "المحور"، مع الإعلامى محمد الباز: "بصفتى راجل كنت في القوات الجوية قبل كده، ولي وضعى وتاريخى مقدرش أطلب رقم من أي حد وأقوله ادينى لو سمحت عشان أنا اتظلمت"، موضحا أنه فى الطائرة لا يوجد حاجز بين الراكب والطيارين، وأى أحد يجلس يمكن بخطوتين يكون في "الكابينة".
وتابع: "الفنان محمد رمضان لما دخل الكابينة مفيش حد هيقوله متدخلش، لما دخل كان الكرسى اللى جنبى فاضى لوجود الطيار المساعد في الحمام، وقعد على الكرسى وطلب ياخد صورة تذكارية، وكثيرا من القامات الكبيرة طلبت تاخد صورة تذكارية وهى صورة شخصية وليست للنشر، وأنا قلت لمحمد رمضان الصورة دى لو اتنشرت هتقفل بيوت، هو قعد بس مش معناه إنه هو اللى بيسوق الطيارة"، مؤكداً: "اللقطة طلعت إني دخلته وسمحتله يتصور وإني طلبت منه فلوس والله ما حصل".
وذكر أن الفنان محمد رمضان جعل صديقه سعيد إمام أخبره بأن يقدم السيرة الذاتية الخاصة بي في إحدى شركات الطيران، معلقاً: "سى في إيه اللى أقدمه بعد العمر دا كله، أنا عندى 62 سنة، ولي تاريخى أكثر من 40 سنة طيران، أقدم في شركة وأقولهم أشتغل عندكم، كتر خيره، ولكن هم لم يقرأوا العقوبة اللى اتوقعت عليا وهى إيقاف مدى الحياة عن الطيران وعدم مزاولة أي مهنة تمت بالطيران، هو مكلمنيش لغاية دلوقتى"، مستطرداً: "كل أمنيتى إن الكلام ده يوصل لمعالى الوزير ويعيد النظر في العقوبة".
وكان الفنان محمد رمضان قال في مقطع فيديو جديد عبر صفحته على فيس بوك: "جمهورى الغالى شعب مصر الحبيب.. لكل متابعى أزمة الكابتن الطيار أشرف أبو اليسر.. أنا زي ما وعدت عمرى ما هتخلى عنه.. أول أمبارح الحمد لله كلمت صديق ليا مدير شركة للطيران الخاص وحكيتله الموضوع، وقالى إن شاء الله خلال أسبوع يكون اشتغل ورجع لمهنته".
وتابع رمضان: "كلمت الأستاذ سعيد إمام مدير روتانا، وقولتله يتواصل مع الكابتن أشرف، يقوله محمد رمضان ينتظر الـ CV، علشان كلمت شركة إماراتية، وكان رده إنه مش هيبعت الـ CV.. فده الحل من وجهة نظرى.. طبعا ده اللى كنت أقدر أعمله.. ولكن الكابتن أشرف بعت المحامى الخاص به، وقعد مع مدير الحسابات الخاص بيا، وكان اللى عوضه ويرضيه.. فحسب حسبة كان باقيله 3 سنين ويطلع على المعاش بالإضافة لمكافأة نهاية الخدمة، وبالإضافة للمعاش وشوية حاجات.. جمعهم وقالى إنه محتاج 9 ونص مليون جنيه.. فأنا سايب الحكم للى بيعلقوا وبيقولوا محمد رمضان تخلى عن الراجل.. لو انتوا شايفين إن ده يرضى ربنا أنا هعمله عادي جدا.. أنا سايبلكوا الرد".