قال الفنان رامى صبرى، أنا عملت أغنية لنادى الزمالك بعد ما كسب السوبر لكن أنا ما غنيتهاش أنا لحنتها أنا بحب الزمالك وبشجعه وزى أى حد من جمهوره عاوزه يبقى فى تقدم.
وأضاف خلال لقائه مع الإعلامية ناردين فرج على القناة الأولى المصرية ببرنامج التاسعة: طبعا اتفاجئت عن الزمالك ما راحش الماتش اتضايقت جدا جدا زى أى حد بيحب أى حد، وكتبت بوست وقولت أنا مش هشجع الزمالك ودخلت نمت وصحيت لقيت الدنيا مقلوبة، لكن أنا كنت متضايق وما كانش قصدى الجمهور أو النادى أنا كنت متضايق أنه ما راحش الماتش.
تابع: أنا مش بحب أتكلم عن أى حد بس كل واحد بيسوق لنفسه عن طريق اسم زى نمبر وان أو الملك لكن أنا علقت على الملك لأنها كلمة خاصة بالله سبحانه وتعالى، وفى فنانين بتحب تسوق لنفسها باسم وده مش غلط وفى ناس كتير منهم بتنجح وفى ناس زيى بتحب شغلها هو اللى يسوقها أنا عشت وتعلمت من فنانين كبار زى عمرو دياب ومحمود ياسين وعادل إمام ونور الشريف اتعلمت منهم إزاى أسوق شغلى بشكل محترم وإزاى احترم الجمهور.