علق الإعلامي عمرو أديب على "مسيرة الكعبة" التي شهدتها شوارع محرم بيك بالإسكندرية وقال: "أنا بطالب الأمن أنه يعرف مين دول لأنهم مش عبط عشان ينزلوا كده، دول قاصدين يلبسوا البلد في الحيط، مهو مش معقول يكونوا نازلين كده بدون وعي، الناسم مش خايفة والأعداد كل يوم بتزيد، وبالمناسبة البلد دي لن تغلق أبوابها وستظل تعمل في الفترة دي عشان الدنيا متنهارش".
وأضاف عمرو أديب، خلال برنامج "الحكاية" الذي يذاع على قناة mbc مصر: "أنت في نعمة كبيرة، ده أنت بتنزل وبتروح لماما وبتأكل وبتحلي وبتقول رمضان كريم، وعلى فكرة لو كملنا كده قفزات زيادة حالات الإصابة بفيروس كورونا هتزيد، ورئيس الوزراء كان بيتكلم بتعقل وواقعية شديدة واتكلم في الواقع وقالنا نتعايش، وكان يقصد بالتعايش ده هو أننا نتبع الإجراءات الاحترازية ونعمل طوابير ونلبس الكمامة، ونبقى زي الناس بتاعت برة".
وقال عمرو أديب: "ألمانيا قررت تفتح الدنيا بعد ما قفلت، وفي الفترة اللي قفلت فيها تكبدت خسائر اقتصادية وإنسانية فادحة، على فكرة أنا خايف عليك وعلى نفسي وعلى عيالي، وإحنا عدينا مرحلة ده جاي من السفر، لكن دلوقتي عندنا إصابات جماعية ومش هنعرف نتتبع أثر الإصابات زي زمان، ومتجيش تزاحم وتيجي تقولي الأرقام كتيرة ليه، احنا لحد انهاردة مبنعملش الصح، وهذه الإدارة الحالية للدولة مخدتش أي إجراءات شديدة على الناس لأنهم باصين للقمة العيش والـ100 مليون".