كشف الإذاعى باسم كميل، مذيع برنامج "فول 92.1" المذاع على راديو "إينرجى"، عن إيجابية المسحة الثانية الخاصة بفيروس كورونا التى أجراها أول أمس، مؤكدا أنه محبط للغاية ولا يعرف كيف يتصرف، وكتب عبر حسابه بموقع "إنستجرام": "كنت جاهز ومحضر نفسى إنى اقولكم اخبار حلوة لكن للأسف عملت المسحة أول إمبارح والنتيجة إنى لسه إيجابى".
وتابع "مع إن الدكاترة قالولي إنه عادى، وفى ناس ممكن تفضل إيجابية لمدة شهر بعد الـ14 يوم عزل، وإنه علميا وطبيا أنا ممكن خلاص أطلع من العزل اللى أنا فيه لكن طبعا أعمل كل إجراءات الوقاية وكده، لكن أنا خايف أعمل كده بما إنى عايش مع أهلى".
وأضاف: "طبعا انا بشكر ربنا مليون مرة إن حالتي كانت بسيطة واننى متعبتش جامد، بس انتم مش متخيلين قد إيه العزل فى أوضه ده سيئ إزاى.. وقت فراغ كتير بيخليك تفكر في كل حاجة، فكرت في حاجات وحشة قوي مش المفروض افكر فيها، لكن الحمد لله برضو فكرت فى كل حاجة أنا نفسي أرجع اعملها لما اطلع من العزل، وكل حاجة انا نفسى أبدأ اعملها لما اطلع من العزل".
واختتم كلامه قائلا "كان نفسي أكون إيجابي وأقولكم أخبار حلوة لكن انا محبط، مش عارف راسي من رجلي، و مش عارف المفروض اعمل ايه دلوقتي ولا أتعامل إزاي. فا لو سمحتم، لو قريتوا البوست لحد الحته دى، ادعولي".
وكان كشف باسم عن إصابته يوم 16 يونيو حيث نشر فيديو عبر حسابه بموقع "انستجرام"، يعلن به إصابته قائلا: "اليوم تم تأكيد أنني مريض فيروس كورونا.. الحمد لله حالتى خفيفة من COVID 19. ولكن رحلتي وأعراضي كانت مختلفة عن أي شيء قرأته أو رأيته من قبل. لذا أردت أن أشاركك ذلك حتى نكون على اطلاع أفضل وتعليم أفضل حول هذا الفيروس حتى نتمكن من هزيمته".
وقال كميل إنه يشعر بأعراض فيروس كورونا المستجد وهو ما استوجب التزامه بالعزل المنزلي وعدم الذهاب إلى الاستوديو، مؤكدا أنه سيستمر في تقديم برنامجه الذي يذاع كل يوم من الثالثة إلى الخامسة عصرا من داخل العزل.
