سيدة القطار لتليفزيون انفراد: "المجند صعب عليا واللى يهين ولادى أكله"

قدم تليفزيون انفراد تغطية خاصة لواقعة فيديو مشادة الكمسرى والمجند الذى انتشر على مواقع التواصل الاجتماعى بسبب ثمن التذكرة، قبل أن تتدخل سيدة وترفض إنزال المجند من القطار، وتصر على دفع ثمن التذكرة له. واستضافت التغطية الشاملة من "تلفزيون انفراد" صفية أبو العزم صاحبة الواقعة والمعروفة إعلاميا بسيدة القطار، والتي تعمل مشرفة رياض أطفال بإدارة غرب المحلة، والتي حدثتنا عن تفاصيل الواقعة، والدافع وراء إصرارها على سداد قيمة التذكرة للمجند. وقالت سيدة القطار:" أنا كنت قاعدة فى الكرسى اللى فى ضهر العسكرى ، والكمسرى كان جاى من ورايا واللى لفت نظرى للموقف هو أن الكمسرى كان بيزعق للعسكرى وقال الحوار اللى حصل ومصمم أنه ينزله والعسكرى كان لابس كمامة فمعظم كلامه مش واضح، فالكمسرى قاله شيل النجوم اللى على كتفك دى تقريبا ليكونوا مفهمينك هناك حاجة.. ومصمم أنه ينزله .. فالعسكرى قاله أنا هنزل". واستكملت السيدة صفية رواية كواليس الواقعة قائلة: "فهمت أن الاختلاف على قيمة التذكرى الـ22 جنيه، والعسكرى كان نازل معاه .. لأن كلام الكمسرى كان جارح أيا كان لو عندك حق اطلب حقك بأسلوب كويس .. فانت كده ضيعت حقك .. وأنا كأم وعندى 3 ولاد فتخيلت ابنى في يوم مكانه.. فقمت وصممت أنه مينزلش .. وهو كان مصمم ينزل وهو إنسان محترم ومؤدب .. وكان رافض انى أدفعله وقطع الفلوس غصب عنه وهو بيرجعهالى .. والكمسرى قاله اديك قطعتها فقولتله فداه وطلعت فلوس غيرها ودفعت وهو كان مصمم أنه مدفعلوش.. وبعدها فضلت أعيط عياط كتير والعسكرى كان بيطبطب عليا .. هو صعب عليا وانا اللى يهين ولادى أكله بسنانى".