كشف النجم خالد النبوي عن عشقه الكبير للسينما أكثر من التليفزيون والمسرح، وكان السبب في ذلك وقوفه أمام كبار نجوم السينما في بداية مشواره، حيث قال أثناء استضافته مع الإعلامي رامي رضوان، في برنامج مساء Dmc: "الكبار أوي اللي أثاروا فيا بتوع السينما، وأنا طالب في المعهد ومخلص سنة تانية، بلاقي نفسي بعمل فيلم قدام السيدة سهير البابلي والكبير عزت العلايلي والأستاذة سماح أنور والمخرج الكبير محمد عبد العزيز، والمؤلفة والمنتجة مني الصاوي، وكأن الأقدار كلها عايزاني أعمل الفيلم ده، أو ابدأ البداية دي".
وتابع النبوي: "أنا كنت طالب في معهد الفنون المسرحية وجالي طالب في معهد السينما يقولي أنا عايزك تبقي بطل مشروع التخرج بتاعي، الفيلم أسمه العازف، رحت عملته، المشرف على الفيلم ده الأستاذ محمد عبد العزيز، أنا في المعهد طالب مجتهد جدًا جدًا، الأستاذة بتاعتي دكتورة سميرة محسن، عندها صلة قرابة بالأستاذ محمد عبد العزيز، رشحتني له".
وأضاف: "أستاذ أشرف فايق إسماعيل صديقي المخرج، كان يعرفني وقتها كنت بروح المسرح العائم، كان في كشك كتب، أشرف قابل مدام مني الصاوي وقالها انت بتدور علي حد، في واحد اسمه خالد النبوي وعلي فكرة كل يوم بيبقي موجود في المسرح العائم، وهو نازل قالي مدام مني الصاوي بتدور عليك، كلمتها وقابلتها في مدينة نصر، قالتلي أنت بالظبط اللي بندور عليك، تروح بقي تشوف الأستاذ محمد عبد العزيز هيقول إيه، رحت قابلت محمد فى معهد السينما، اتكلم معايا شوية، وهو كان شافني فى الفيلم، وقالي دكتورة سميرة كلمتني عليك، تروح بقي تقابل مدام سهير البابلي، لاقيت بقي علي الباب ناس مستنينى، أول ما شافتني، قالتلي حبيبي ده أنت شبهي، وخدتني لكل الناس، حسيت انهم واخدني بالحضن".