فى حلقة جديدة من برنامج "ع الرايق" حل الفنان حسن أبو الروس ضيفا على البرنامج مع الزميلة سارة صلاح، والمعروض على تليفزيون "انفراد"، وخلال الحلقة أجاب على مجموعة من الأسئلة بشكل كوميدى منها مين صاحب فكرة أن حفل زفافه يكون فى مدينة الملاهى ورقصته مع زوجته وأغرب موقف حصل له فى الفرح.
وقال حسن أبو الروس: "أنا أكتر مكان بحبه الملاهى وقولت أعمل فيه الفرح، ومش شايف الفكرة غريبة ومعرفش إن الفرح هيبقى تريند ومعزمتش حد يصور وفجأة فى وسط الفرح اكتشفت الناس اللى جوه بتتفرج على الفرح على اليوتيوب ومكنتش مرتب أن كل ده يحصل".
وأضاف حسن فى حديثه: "أغرب حاجة حصلت فى الفرح الناس اللى معزمتهاش كانت أكتر من اللى أنا عزمتها يعنى فى ناس أنا مش عزمها كتير جدا لقيتها وعارف إن أنا مش عازمهم ولقيتهم بردوا، موقف غريب أنى أشوف الإعلامية منى الشاذلى راكبة الدودة وفى بردوا دكتور اسمه مصطفى محمود جراح وله هيبة وبيشتغل فى أمريكا ببص عليه لقيته راكب المراكب، وبحبه جدا وهو راجل قيمة وقامة بس انبسطت إن الناس طلعت كل الطاقة اللى جواها فى الفرح".