أكدت الإعلامية منى الشاذلى، خلال حلقة خاصة مع الإعلامية فاطمة مصطفى على الراديو 90.90 العديد من الأمور بخصوص حياتها الخاصة ومسيرتها الفنية، وذلك حين تطرقت إلى أنها ابنة الطبقة المتوسطة، وجزء من شخصيتها يتمثل في احترامها لنفسها في مظهرها دائمًا، قائلة: "إحنا لازم نطلع بشكل لائق في التليفزيون لأن ده جزء من شغلنا، سواء في المظهر أو طريقة التحدث، ولكن بعيدًا عن التليفزيون أنا زيي زى أى سيدة في بيتها".
وأضافت: "أنا ابنة الطبقة المتوسطة، وجزء كبير من اللى اتربينا عليه ونشأنا فيه، بأننا لابد أن نحافظ على شكلنا، فأنا مش موديل ولا سوبر ستار، وبالتالي علي عندما أكون على ريد كاربت أو في مناسبة أنى ما اهتمش بالشكل بصورة كبيرة، ولكن عليا أكون بسيطة، وما يبقاش عندي درجة من الإبهار لأن الإبهار عندي في منطقة أخرى".
كما قالت إنها أم لثلاثة بنات منهما اثنتين توأم، قائلة: "أنا مش ديمقراطية، لأن في أساسيات، وبشوف إن الأمومة مُقدسة، وشغلى جنب البيت، وممكن ابقى في اجتماع وحالة طوارئ في الشغل، وأقول للى معايا بريك نص ساعة وراجعه، وفى الوقت ده اروح جرى لبناتى، اشوف في إيه حاصل".
وأضافت مقدمة برنامج "معكم": "ممكن أروح علشان في واجب ما اتعملش، في حد راجع من المدرسة بيعيط، فاروحله مش بستنى لبعد التصوير واخلص واروحلهم، لأن الأمومة دي أهم حاجة".
كما تطرقت إلى المطبخ قائلة: "في أكلات كتير بيطلبوها مني، لأن في أساسيات عندنا أن الأكل بيتى، والمطبخ عندنا دايمًا عامر، وحاجات بتتعمل طول الوقت، وهو بالنسبة لينا قلب البيت، واجتماعات العيلة بتبقى في المطبخ، وماشيين مع الموسم، يعني في الشتا نجيب الأكل اللى طالع فيه، وهكذا".