تحدث المطرب اللبناني وائل جسار عن كواليس أغنياته الرومانسية والحب في حياته خلال مداخلة هاتفية فى برنامج "تريو" تقديم الإعلامية مها بنسى على إذاعة نغم أف أم، قائلا: "الواحد مايقدرش يكدب على نفسه لو ما عندي الاحساس الصادق مكنش بان في أغنياتى، فكل ما يطلع من القلب بيوصل للقلب مباشرة".
وأضاف: "أنا الحمد لله صادق بما أقوم به زي اللى بقولوا في الأغانى بعمله في بيتى، وبحب الناس وقريب منهم جدا وأى حاجة صغيرة بتبكينى وبتأُثر من أقل حاجة بتحصل قدامى".
وتابع وائل جسار: "لما يكون فيه توافق بين طرفين فكل يوم عندهم عيد حب، وأنا زيي زي كل الرجالى الشرقيين وما تخلقتش في قالب لوحده ولا نازل من السما، انا بزعل وبفرح وبحس كل الأحاسيس".
واستطرد: "أنا من النوع اللي بحب بيتي، وممنوع يكون فيه زعل لازم يكون فيه حب وحنان وعواطف، بالنهاية جايين على الدنيا مرة واحدة، وممكن أضاف أيام تزعل في الشغل، ولكن في النهاية بنحاول ندور على الفرحة وعلى الحب والإحساس؛ لأن من غيرهم مقدرش أعيش ومقدرش أكمل".
وأردف: "أكبر غلط إن الانسان بيفكر أن لما بيكون في أولاد الراجل بيتركن على جنب وده مفهوم خاطئ جدا عن الزواج لأن العكس تماما لما بيكون في أولاد بيزيد الحب، لأن بتكون جابتلى أولاد يحملوا اسمى فلازم أحطها على راسى من فوق وأى حاجة تسعدها هعملها".
وقال جسار: "أنا عصبي جدا وبثور في لحظة ومبحبش الأخطاء، واللي بيزعلني أكتر وأكتر الإنسان المدعي بالمفهومية بيخليني عصبي ومش شايف قدامي، ومراتي ذكية جدا الحمد لله وبتستوعب غضبي بأسلوبها وبطريقتها بتخليني أرجع تاني زي ما أنا".
وعن تجربة التمثيل قال وائل جسار: "بصراحة عُرض عليا التمثيل كتير، ولكن أنا مركز في الغناء، لأن التمثيل سلاح ذو حدين، وأنا مش حاسس نفسي أكون ممثل وأتقمص شخصيات مع إن كتير من المخرجين والناس اللي بتشوفني في الحياة قالولي انت ممثل من الطراز الرفيع".
وأشار إلى أنه يعمل على الأغانى التي تعيش وليست مقتصرة على وقت طرحها فقط، وقال: "أنا أغنياتى بتاخد وقت على ما يحفظها الناس وعشان كده بتاخد وقت على ما تتنسى".
وعن أغنية "يوم زفافك" قال وائل جسار: "الأغنية دى كانت لزوجتى لأنها كانت هتتجوز وأنا خطبتها، مختتما حديثه برسالة لزوجته قائلا: "ربنا يخليكي ليا وبرفع راسي بيكي لأنك بتتعبي ليا ولعيالى".