كشفت الإعلامية دينا عبد الكريم، عن أشهر 10 أكاذيب تقال فى البنوك، وقالت أن أول كذبة هى جملة "السيستم واقع"، وجملة "أنا بديلك أحسن معدل فائدة عندي"، وهذه كذبة يعرفها كل من يعمل فى البنوك لأن لا يستطيع أحدا أن يخدع البنك المركزى فى هذا الأمر.
أضافت دينا عبد الكريم، فى برنامجها "شغل عالي" المذاع عبر قناة CBC: "الكذبة الثالثة أن اللى شغال فى البنك يقولك انت كسبان كسبان، ولكن فى الطبيعى الاتنين كسبانين، العميل والبنك نفسه، أما الكذبة الرابعة يقولك البنك مش بيأخر أى حاجة وإن تحويل الفلوس جاى فى السكة، والتأخير من البنك التاني، والكذبة الخامسة بيكذبها موظفين البنوك وماحدش يصدقهم أبدا لما يقولك إنه أنا بعتذرلك يا فندم مش هقدر أديلك القرض لظروف إجرائية، ولكن هو مكسوف يقولك أنت غلبان جدا وهو مش واثق فيك إنك هتسدد القرض".
وتابعت: "الكذبة السادسة، أن لو ليك ورث فى البنك، اعرف إنه فى البنوك بيشتغلوا بسياسة الحى أبقى من الميت، والكذبة السابعة إنه لما يزهق منك الموظف يقولك إحنا فى خدمتك يا فندم، أما الكذبة الثامنة إنه يقولك أن المشكلة هتتحل فى خلال 5 أيام عمل، والتاسعة إنك وأنت بتعمل أى حاجة فى البنك يقولك بدون مصاريف إدارية، اوعى تصدق ودور على المصاريف الإدارية لأنها مطلوبة، والكذبة العاشرة، لو كلمت أى حد من خدمة العملاء، يقولك لحظات وهيكون معاك أحد ممثلى خدمة العملاء.. دى كذبة.. مفيش لحظات انت وحظك".