علق كابتن عصام عبد الفتاح رئيس لجنة الحكام باتحاد الكرة، على غياب التحكيم المصري عن مونديال الدوحة 2022 قائلاً: هناك انزعاج بين الناس بسبب ذلك بس الناس محتاجة تفهم أكتر أنه على مدار تاريخ التحكيم المصري اللي راحوا كأس العالم هم خمسة حكام مصريين فقط وتقريباً ثلاثة مساعدين وبالتالي عندما يذهب مساعد حكم واحد بعد غياب المنتخب المصري ده شرف كبير لأنه مش دائماً التحكيم في كل دولة بيبقى في القمة على طول.
تابع خلال مداخلة عبر برنامج "كلمة أخيرة" الذي تقدمه الإعلامية لميس الحديدي على شاشة ON": في النهاية مسابقة بين الحكام تختلف من دورة لدورة وإحنا عندنا 54 دولة في إفريقيا واللي هيروح فقط 5 حكام و10 مساعدين وتمثيل مصر شرف كبير.
أكمل: الناس مش فاهمة مش لازم يكون لي حكم ووجود مساعد شرف كبيرخاصة أن المنتخب المصري غير ممثل في الأساس واسمنا هيذكر إننا ممثلين بمساعد حكم.
وقاطعته الحديدي: ألا يزعجك وجود خمس حكام من إفريقيا وفيه واحدة ست ده غير العالم العربي وحكام مساعدين من دول إفريقية وعربية هل تلك الإحصائية لم تزعجك أليست مؤشر على مستوى التحكيم المصري؟ مش لازم إزاي هو إحنا كده في القاع؟، قال: بتحاسبيني على حاجة رغم أني رئيس لجنة التحكيم منذ أربعة اشهر فقط ولكن رغم ذلك فعلى مدار التاريخ مكنش فيه غير خمس حكام مصريين على مستوى كأس العالم.
واصل: "عاوزين نبدأ نعد من الآن للبطولات القادمة التحكيم المصري على مستوى إفريقيا كويس جداً وفيه مستويات كويسة زي أمين عمر ومحمود البنا ومحمد معروف واحمد الغندور وماشيين كويس لكن اختيارات كاس العالم بتمشي بشكل ومعايير مختلفة مثلاً في بعض الاوقات بيدوا فرص لحكام جداد".