قالت الإعلامية دينا عبد الكريم، إن هناك جملة مرت أمام الجميع وهي "أنا مش عايز يبقى عندي مدير يتحكم فيا، أنا عايز أبقى حر"، وتابعت: "الجملة دي كانت سبب في إن ناس كتير تسيب وظايفها الثابتة وتبدأ رحلتها في عالم المشروعات الصغيرة مثلا، أو إن ناس تانية تقرر تشتغل حر، بدون الارتباط بمواعيد عمل محددة أو مدير".
أضافت دينا عبد الكريم، في برنامج "شغل عالي" المذاع عبر قناة cbc: "فكرة إنك تسيب شغلك المستقل علشان شغلك الخاص، وفي الآخر لم توفق بسبب ظروف ما، صعبة، ولكن الفكرة في النهاية ماينفعش تقول علشان ميبقاليش مدير".
وتابعت دينا عبد الكريم: "كل واحد ليه علامة تجارية، يعني مثلا الدكتور مجدي يعقوب، القلب، محمد صلاح، الكورة، ففي حاجة اسمها علامة تجارية، وبني آدمين هما علامة شخصية، يعني باختصار كل واحد فينا ماشي وفيه على دماغه يافطة ماحدش يعرف عنها حاجة، أنا مش شايفها ولكن كل الناس شيفاها".
وأكملت: "العلامة الموجودة ليا هي في الغالب اللي الناس بتقوله عليا وأنا مش موجود، وإحنا عندنا فوبيا من الحكاية دي أو عندنا فوبيا وما اتعلمناش وبنركز جدا في المكتوب عني وأنا مش موجود، وفي مصر دي بنسميها السمعة، والسمعة هي الحاجة اللي بتتقال عني وأنا مش موجود، ودي حاجة بنبنيها على مدار السنين".