وفاء عامر: مكنتش بهرب من المدرسة وأهلى عودونى أقول مش هروح لكن بعذر

قالت الفنانة وفاء عامر كنت متعودة انى أقول لأهلى انى مش عاوزة اروح لأنى عندى حصة واحدة، لكن ما كنتش بهرب من المدرسة. وأضاف خلال مداخلة ببرنامج رأى عام مع الإعلامى عمرو عبد الحميد: أهلى كان عودونى أنى أقول لو مش عاوزة اروح المدرسة وكذلك عودت ابنى لكن لابد ان يكون هناك عذر. وتابعت: كان عندى مدرسة عربى فاقدة في الأمل وكانت بتقعدنى في آخر الصف، وفى يوم قالت إنها هتملينا درس، ولما مليتنا الدرس، جبت 9 من 10 ، قالتلى انتى غشيتى منين، قولتلها ما غشيتش، طلعتنى على السبورة، وبعدها خلت الولاد يصفقولى، ودخلتنى الطلائع، وبقيت أحبها جدا، واحب المادة، ولما طلعت الأعدادية، كنت بعيط وبقراء لها الفاتحة لحد دلوقتى. ووجهت نداء للمدرسين، ارجوكم خلوا الأطفال يحبوكم، وخلوكم ورا الفاشل لحد ما ينجح، وأنا بصور حاليا في العيلة دى، معانا محمد ثروت، وإنعام سالوسة، وبصور ضيفة مع على ربيع وهو دمه خفيف.