قالت الإعلامية أميرة بهي الدين، إن الدراما التلفزيونية والمسلسلات، شديدة الأهمية في مجتمعنا، فهى لا تحتاج إلى النزول من المنزل لمشاهدتها، ويمكنك ممارسة كافة أنشطتك المنزلية أثناء مشاهدتها أو الاستماع لها.
وأضافت خلال برنامج "افتح باب قلبك" الذي يذاع على قناة "cbc": "لما بيجيلك ضيف، ممكن تقعد معاه نص ساعة يشرب فيهم الشاي ويمشي، لكن لو قعد ساعة ولا اتنين ولا تلاتة، هيبقة لازق فيك، نفس الكلام فى المسلسلات، بيجى زى الضيف، وبعدها بيبقى من أهل البيت مش مجرد ضيف، المسلسلات بتبقى شبهنا وشبه حياتنا".
وتابعت: "الشركة المتحدة للخدمات الإعلامية، قررت إنها تاخد على مسؤوليتها من ضمن المسئوليات الكبيرة، أن يكون في أعمال درامية تبني الوطن وتدعمه، أعمال درامية تقوي ظهر المصريين، زي ما السياسي بيبني الوطن والمهندس بيبني الوطن، الفنان برضه بيبني الوطن".
وقالت: "المتحدة قدرت إنها تعمل نوع من الدراما بيدخل بيوتنا وبيدعم الوطن، أنا مبقتش مضطرة دائما أجيب حفيدي وأديله دروس دمها بارد، ولكن لما يشوف المسلسل، هيشوف المعنى بطريقة فنية راقية وجميلة، على لسان وتصرفات ممثلين".
وتابعت: "أنا هنا مش بتكلم على المسلسلات الوطنية الداعمة للانتماء التي تعرض لنا سيرة الأبطال والشهداء، وكلنا فاكرين الاختيار والعائدون وكلبش بكل أجزاءه، شوفنا منسي، لما كان الاختيار بيتعرض كان كل مصر والدول العربية قاعدين حاطين أيديهم على قلوبهم وخايفين عليه".
وقالت: "أنا بتكلم على دراما من نوع تاني ترسخ قيمنا وعاداتنا وبتعرض على الشاشة قصادنا أجمل ما فينا، زي أبو العروسة، وبينا معاد، وجروب الدفعة، وغيرهم من المسلسلات، دى دراما المصريين لفوا حواليها لأن الأبطال دول شبههم، مفيش عيل في المسلسل ده يرفع إيده على أبوه".