قالت الفنانة لبنى ونس إن مشهد الفلاش باك بمسلسل جعفر العمدة رجعنى فعلاً صغيرة، وهذا برنامج بيستخدم فى هوليود، ومحمد سامى استعان به وأنا أحييه عليه وبنتى بعد عرضه كلمتنى يا ماما أنت صغرتي جدًا ومتصدرة التريند.
وأضافت خلال حلولها ضيفة ببرنامج واحد من الناس مع الإعلامي عمرو الليثي على شاشة الحياة، أن أستاذ محمد سامى فيه ميزة حلوة قبل التصوير بيتحدث مع الممثل ويقول له هيعمل إيه، ووقت التصوير بيوجهنا أثناء المشاهد بطريقة هادية تخلينا مركزين فى المشهد، وأنا اشتغلت مع الفنان محمد رمضان في مسلسل زلزال، وأنا بحبه جدًا وبيتعامل معايا برقى، ومش بيحسسك أنك واقف أمام نجم لكن ممثل أمام ممثل.
وتابعت أننى استمتعت بدور فاطمة فى مسلسل جعفر العمدة جدًا، ومحمد سامى كسر كل توقعات الجمهور فى المسلسل، وأنا شخصيًا كنت شغالة فى المسلسل كنت مستنيه أشوف باقى الأحداث.
وعن دورها فى مسلسل جزيرة غمام قالت إن المسلسل عمل لى ربكة إنسانية وكنت عاملة دور زين المواصف وهى إنسانه تعتبر المادة الخام للشيطان وكنت بجرب فى أولادى وأخواتى وأصحابى الدور علشان أشوف هيتقبلوا الشر منى إزاى.