قالت الفنانة عارفة عبد الرسول إنها من مواليد حى الإبراهيمية بالإسكندرية لكنى اتربيت فى حى الحضره، وبابا سمانى عارفة على اسم جدتى وكنت مش بحب الاسم، وكانوا بيندهولى فى العائلة بميرفت، واكتشفت بعد كدة أن الاسم حلو.
وأضافت خلال لقائها مع الإعلامى دكتور عمرو الليثى ببرنامجه واحد من الناس على شاشة الحياة، أعمامى ٧ وأبويا أصغر واحد فيهم وفتح محل بقال، وكان بيوقفنى فى المحل مكانه لأنه كان شاب وذواق للفن بيروح للسينما ويسيبنى فى المحل، وأنا فى سن ٣ سنوات، ولم أعش طفولتى، وأول مرة أركب ملاهى فى حياتى كان فى مسلسل اللعبة.
و تابعت أن والدها كان بيديها فى الأسبوع ٢٥ قرشا، وكنت بحوشهم واشتريت بيهم حاجات ليا، وبابا تعب من البقالة فقولت ليه نغير يا بابا نعمل محل كوافير فقال لى مش شغلانتنا، فقولت ليه اتعلمها وفعلا روحت اشتغلت فى كوافير سنة بدون مقابل، واشتغلت مع الفنان وحيد سيف كان بيعمل مسرحية فى الاسكندرية، وكان فى فنانة اسمها ولاء عندها تصوير فيلم، وقالوا لى اعملى الدور مكانها، ورجعت تانى بعد تاجيل الفيلم فالأستاذ وحيد سيف قالى خلاص بضحكتك الحلوة دى تقعدى على شباك التذاكر وفعلا قعدت ابيع تذاكر.