قرر الفنان الشاب هادى خفاجة اعتزال التمثيل نهائيا، فى بيان كتبه على صفحته الخاصة لموقع التواصل الاجتماعى "فيس بوك"، ذكر فيه خفاجة أن اعتزاله بناء على موقف جعله يتأكد أن العمل فى الوسط الفنى أصبح عبارة عن عصابات، حيث قال "قررت أنا هادى خفاجة اعتزال التمثيل نهائياً فى مصر وده بسبب الموقف اللى انا هاحكيه هو موقف فى قمة قلة الذوق اللى فى الدنيا جاتلى مكالمة الساعة ١٢ بليل ان محمد سعد عايزنى فى تصوير فى حلقة من برنامج وش السعد اللى هيا كانت انهارده وانه عايز يقعد معايا طبعاً لبست وروحتله الساعه ١ بليل كان موجود الكاست كله ونجوم الحلقه ايتن عامر ومنه عرفه وعملنا بروفه واتفقت مع مدير الانتاج والملابس وكل حاجه واستاذ سامح عبد العزيز المخرج قعدت معاه واتكلمنا عن الشخصيه واتفقنا ان التصوير بعدها بيوم خلصت كانت الساعه ٤ الفجر روحت البيت".
وأضاف خفاجة: "نمت وصحيت استعديت نفسياً ان رايح التصوير وحفظت السيناريو كان المعاد الساعه ٥ المغرب لقيت اتصال وانا فى الطريق الساعه ٤ العصر من واحد من مساعدين الإخراج بيقولى استاذ هادى احنا اجلنا الاسكتش بتاع حلقة حضرتك وهنكلمك نقولك امتى التصوير ان شاء الله.. افتح التلفزيون من شويه ألاقى الاسكتش بتاعى اتصور بممثل تانى ؟؟ طب ليه الف والدوران الحمد لله تاريخى مش هيقف على حلقه بس موضوع تقدير انا حبيت احكى لانى وسط حاجات كتير حصلتلى مكنتش مستحمل حركه زى دى وبكرة بإذن الله هاكون فى نقابة المهن التمثيلية وهاسلم أستاذ أشرف زكى عضوية النقابه لأنها متلزمنيش فى شىء دلوقتى بس بجد كفايه تدمير فى المواهب وإحباط فى الناس لأن الوسط بجد أصبح عن عصابات تتحكم فيه"، مشيرا أنه سيكمل مشواه الفنى فى دول أخرى تقدر الإنسانية قبل المواهب والمجالات، ناهيا كلامه "ده قرار نهائى بجد بينى وبين نفسى مش هرجع فيه".
