نعت الفنانة رانيا فريد شوقى، الفنان الكبير ممدوح عبد العليم، والذى وافته المنية مساء أمس الثلاثاء بعد أزمة قلبية مفاجئة، أودت بحياته أثناء تواجده داخل إحدى صالات الجيم، واصفة إياه بالفنان المحترم والإنسان الطيب، حيث كتبت عبر صفحته الخاصة على موقع التواصل الاجتماعى "فيس بوك".
"حربى فى خالتى صفية والدير ورفيع بيه فى الضوء الشارد الله يرحمك يا فنان يا محترم ويا إنسان يا طيب وخلوق، شريط من الذكريات مر فى دماغى وأنا بصور معاك المسلسلين دول ياه العمر بيجرى، كنت تقولى يلا نذاكر المشهد ونقعد نقول ونعيد باللهجة الصعيدى، وكان فى مشهد لازم تضربنى بالقلم، وأنا كنت حامل بجد فى بنتى فريدة خفت عليه واتكلمت مع الأستاذ مجدى أبو عميرة عشان نلغى القلم وهو رفض، قولتلى معلش استحملى عشان ناخده من أول مرة ومانعدش تانى، ولما نجح مسلسل "الضوء الشارد"، نجاح ساحق طلعنا ندوة فى جامعة قنا وكان أبويا متوفى مابقالوش كام شهر من كتر حفاوة الاستقبال بقيت تاخد ايدى نقف على الكراسى عشان الناس تشوفنا من كتر التصفيق وأنا أعيط وأنت تطبطب عليه وتقولى أفرحى بنجاحك وأكيد الملك شايف وسعيد بيكى، الله يرحمك ويجعل مثواك الجنة ويصبر مراتك وبنتك ياه قلبى وجعنى أوى لا إله إلا الله".