أكرم حسنى: الست بتعامل زوجها مثل أسرى الحرب

قال أكرم حسنى إن «هناك نوع من السيدات تدعى مدام طلبات وهى التى لها طلبات طول الوقت سواء مادية أو معنوية» مؤكدًا أن «الست تعامل الرجل مثل أسرى الحرب».

وأضاف «حسني» مقدم برنامج «للرجال فقط» على إذاعة «نجوم إف إم»، أنها «تريد دائمًا أن تعكنن على الرجل بطلباتها، مرة تقوله علق الستائر، صلّح الكهرباء، أكوى الملابس، وكأن الرجل خدامة فلبينية تحقق أحلامها».

وأكد أن «الست اللى بتبقى متطلبة تكون غلسة وبايخة، وساعات طلباتها تبقى تخلى الواحد ينتحر وتقفل يوم الرجل من أوله».

وتابع: «الستات طلباتهن كانت كثيرة فى العيد بداية من الكحك والملابس، وختامها السفر للمصيف وجميع لوازمه من ملابس البحر وتأجير "العجل" والبيتش بجي، وساعات الست تنتقل إلى مرحلة طب ليه منشتريش شالية فى الساحل الشمالى عشان نصيف أكثر من مرة فى السنة».

واقترح الإعلامى أكرم حسنى تأجير جزيرة تكون للرجال فقط، بعيدًا عن زوجاتهم لمدة 5 أيام، مضيفًا: «عايز نكون كلنا فى جزيرة لوحدنا بعيدًا عن طلبات الستات».
وتابع «حسني»: «عايز أبعد عن خد كيس الزبالة وأنت جاي، وأشترى شاى ولبن أو ودينى عند ماما أو ركب الستائر، أو أغسل المواعين».

وأردف: «طبعا لو رفضت أى طلب هتفتح على نفسك باب جهنم للخناقات، الست مخلوق محير ومخليني مش عارف أفسر تصرفاتهن ، مع أن الطلبات اللى بتطلبها الست ممكن تنفذها لوحدها».

وأكد أن «الست المتطلفة تستنزف طاقة الشخص الذى أمامها، ولما مراتك هتستنزف طاقتك هتخليك لا قادر تتكلم ولا تتناقش وممكن تسيب البيت فى وقتها وتخرج».